Të paktën 35 të vrarë në Gaza dhe pesë në Izrael është bilanci i përleshjeve të armatosura mes Izraelit dhe Hamasit.
Të mërkurën në mëngjes, Izraeli kreu qindra sulme ajrore në Gaza, ndërsa grupi islamist Hamas dhe militantët tjerë palestinezë, qëlluan me breshëri raketash në drejtim të Tel Avivit dhe qyteteve tjera.
Militantët palestinezë në Gaza kanë shkrepur më shumë se 1,000 raketa në drejtim të Izraelit që nga e hëna në mbrëmje, kur luftimet u përshkallëzuan në mënyrë dramatike pas disa ditëve të trazirave në Jerusalem, tha ushtria izraelite.
Zëdhënësi i ushtrisë, Jonathan Conricus, u tha gazetarëve të mërkurën në mëngjes se si kundërpërgjigje Izraeli po godiste vetëm objektivat ushtarake dhe se ushtria kujdeset për të minimizuar ndikimin mbi civilët.
Të martën, sulmet izraelite shkatërruan një ndërtesë 12-katëshe në qytetin e Gazës.
Izraeli ka shpallur një gjendje të jashtëzakonshme në qytetin qendror të Lodit, pasi protestuesit arabë hodhën gurë ndaj policisë e cila u përgjigj me gazlotsjellës.
Të paktën 12 persona u plagosën në përleshje, njoftoi gazeta izraelite Haaretz. Gjatë natës, situata u përkeqësua.
Mediat izraelite raportuan se disa sinagogave dhe bizneseve u ishtë vënë zjarri.
Times of Israel tha se kjo ishte hera e parë që qeveria kishte përdorur kompetenca emergjente mbi një komunitet arab që nga viti 1966.
Udhëheqësi i Hamasit, Ismail Haniyeh, tha se grupi ishte “gati” nëse Izraeli vendos që të përshkallëzohet situata.
“Nëse Izraeli dëshiron përshkallëzimin, ne jemi gati për të dhe nëse dëshiron të ndalet, ne jemi gjithashtu të gatshëm,” tha ai në një fjalim televiziv.
Jerusalemi ka qenë në fakt skenë e konfrontimeve të dhunshme midis hebrenjve dhe arabëve tash e 100 vjet dhe mbetet një nga qytetet më të kontestueshme në botë.
