Të martën e 17 janarit Përparim Rama dha urdhër për ndalimin e punimeve të një mbindërtimi në lagjen e Bregut të Diellit në Prishtinë.
Këto punime u ndalën pasi konsiderohen si të paligjshme nga Rama.
Përmes një njoftimi publik, Rama kishte paralajmëruar edhe dënim të pa falshëm.
“Sot, pas raportimit nga disa banorë të shqetësuar, për një mbindërtim në lagjen Bregu i Diellit, menjëherë kemi ndërmarrë masat e nevojshme për të ndalur ndërtimin. Inspekcioni ka ndalur punimet e paligjshme, dhe ju siguroj se dënimet për këto raste do të jenë të pa falshme. Ndërtimet e tilla nuk do të lejohen në asnjë rrethanë”, thuhet në njoftimin e Ramës.
Por, mbindërtimi pa leje që u ndalua nga Rama është në pronësi të deputetes së Vetëvendosje, Albana Morina Xharra.
Këtë e ka konfirmuar për Gazetën Insajderi vet deputetja Morina Xharra e cila ka mohuar të ketë vazhduar punimet duke thënë se ky mbindërtim ishte ndërprerë me vendimin që e kishte lëshuar ish-kryetari i Prishtinës Shpend Ahmeti.
Deputetja Morina Xharra nuk e përjashtoj mundësin se edhe në qeverisjen e kaluar ndalimi i punimeve të saj ishte bërë me vendim politik, sepse sipas saj ka pasur ndërtime të panumërta të jashtëligjshme në qeverisjen e Ahmetit
“Kur më janë ndërpre punimet, në pushtet ka qenë qeverisja e kaluar komunale. Atë kohë, siç edhe jeni dëshmitar ka pas ndërtime të panumërta të jashtëligjshme dhe shkelje flagrante të natyrave prej më të ndryshmeve të cilat janë lejuar. Unë personalisht kam raportuar shkelje lidhur me dëmtimin serioz të konstrukcionit mbajtës (prerje e pllakës së armuar meskatshe dhe themeleve të ndërtesës shumëbanesore) me çrast janë rrezikuar mbi 100 jetë njerëzish, por Inspektorati nuk ka reaguar. Jam detyruar rastin me e hap në polici dhe si përfundim, përkundër shkeljeve flagrante dhe rrezikimit të banorëve, Komuna e ka lejuar vazhdimin e punimeve. Andaj për atë periudhë kohore nuk e përjashtoj mundësinë se ka pas vendim politik”, ka thënë Morina Xharra.
