Mbrëmë në një adresim publik Presidenti i Serbisë Aleksandër Vuçiq i ka përmendur edhe serbët e Kosovës. Por këta të fundit duket se janë të pakënaqur me politikat e tij, prandaj kanë bërë thirrje për protestë, shkruan Fol Drejt.
Sipas një njoftimi të shpërndarë në rrjetet sociale, Iniciativa Qytetare Serbe “Mbijetesa Serbe”, ka bërë thirrje për protestë në Veri të vendit, ndërsa një ndër shkaqet e kësaj proteste, sipas njoftimit, ka të bëjë me politikën pa kushte të Vuçiqit karshi Kosovës.
PROTESTË!
Ftojmë të gjithë qytetarët në mbarë Kosovën që të mërkurën më 25 janar 2023, në ora 15:30 në shëtitoren e Mitrovicit shprehim protestë lidhur me:
- Politika katastrofike e negociatave e presidentit Aleksandar Vuçiq dhe pranimi i pakushtëzuar i marrëveshjes së re.
- Sulme të shpeshta me motive etnike ndaj serbëve.
- Uzurpimi i pronës private të qytetarëve nga autoritetet në Prishtinë përmes shpronësimeve të parregullta
- Prania e njësive speciale monoetnike të Policisë së Kosovës, të armatosur deri në dhëmbë dhe në gjendje gatishmërie.
Duket që Vuçiq ka qenë i informuar për pakënaqësinë në rritje ndaj tij, prandaj mbrëmë ndërsa i adresohej opinionit publik serb, lavdëroi edhe qytetarët serbë që jetojnë në Kosovë:
“Gjithmonë ekziston mundësia e forcës madhore, rastësisë etj. Por në politikë nuk ka një gjë të tillë. Gjithçka do të shkojë saktësisht siç ju thashë. Derisa të vijë momenti që duhet të bëjmë një deklaratë. Na pret një periudhë e vështirë, është e sigurt që nuk jemi gjithmonë të drejtë, por është e rëndësishme të kujdesemi për vendin tonë dhe Serbinë. Po i dërgoj një përshëndetje të veçantë popullit tonë në Kosovë, se ata e mbajnë mbiemrin serb, i mbajnë vatrat serbe. E di që më besojnë mua dhe vendin e tyre, sepse kanë dikë që të besojnë. Nuk është vetëm çështja se ku jeni, por edhe çfarë lidershipi shtetëror keni “- tha ai ndër të tjera.
Megjithatë, këto fjalë lavdëruese, nuk i kanë shuar pakënaqësitë, të cilat, duket se po rriten ndaj tij. /FolDrejt/
