Qeveria britanike njoftoi sot heqjen e të gjitha tarifave të përcaktuara nga marrëveshja ekzistuese tregtare Britani-Ukrainë dhe vendosi sanksione të reja ndaj ekonomisë ruse.
Vendimi erdhi si përgjigje ndaj një kërkese të drejtpërdrejtë nga presidenti ukrainas Volodymyr Zelenskyy për të mbështetur ekonominë ukrainase, tha Sekretarja e Tregtisë Ndërkombëtare e Mbretërisë së Bashkuar Anne-Marie Trevelyan në një deklaratë, shkruan AA, transmeton Fol Drejt.
“Heqja e tarifave për eksportet kryesore të Ukrainës, duke përfshirë elbin, mjaltin, domatet e konservuara dhe shpendët, do t’i ndihmojë bizneset dhe prodhuesit ukrainas kur ata kanë më shumë nevojë”, vuri në dukje ajo.
Mbretëria e Bashkuar njoftoi gjithashtu një ndalim të eksportit të disa produkteve dhe teknologjisë drejt Rusisë.
“Produktet e synuara mund të përfshijnë pajisje përgjimi dhe monitorimi dhe do të mbyllin çdo boshllëk ekzistues për të siguruar që Rusia nuk i blen këto mallra nga Mbretëria e Bashkuar”, tha Trevelyan.
Javën e kaluar, Mbretëria e Bashkuar kishte njoftuar se po rrit sanksionet e saj aktuale tarifore kundër Rusisë duke zgjeruar listën e produkteve që i nënshtrohen ndalimeve të importit dhe tarifave të rritura, duke përfshirë ndalimet e reja për argjendin dhe produktet e drurit dhe tarifat me 35 pikë përqindjeje për mallra si diamantet dhe goma./FolDrejt/
