I arratisuri ndërkombëtar dhe i ashtuquajturi “mbreti i kriptomonedhave” Hyeong Do Kwon dhe partneri i tij i biznesit Hon Chang Yon u dënuan të hënën me katër muaj burg secili në Gjykatën Themelore në Podgoricë për falsifikim të dokumenteve të udhëtimit, raporton Klix, përcjell Fol Drejt.
Në dënimin e tyre është përfshirë edhe koha e qëndrimit në paraburgim në Podgoricë, ku ndodhen që nga 23 marsi.
“Të dënuarve iu është shqiptuar masë sigurie, konfiskim i dokumenteve publike, përkatësisht: dy pasaporta kostarikane dhe dy belge, si dhe dy letërnjoftime”, thuhet në komunikatën e Gjykatës së Podgoricës.
Do Kwon dhe Chang Yon u akuzuan për falsifikimin e pasaportave me të cilat synonin të largoheshin nga Mali i Zi më 23 mars me një fluturim privat për në Dubai, kur u arrestuan.
Do Kwon ishte kërkuar më parë nga Interpoli me akuzën e një mashtrimi ndërkombëtar me vlerë 40 miliardë dollarë përmes kriptomonedhave dhe ekstradimi i tij kërkohet nga Koreja e Jugut dhe Shtetet e Bashkuara.
Gjykata malazeze nuk ka marrë ende një vendim për ekstradimin. /FolDrejt/
