Një ekspozitë kushtuar ngjarjes së famshme: grevës së minatorëve të Kosovës të mbajtur në vitin 1989, do të hapet më 1 shkurt në Muzeun Kombëtar të Kosovës, shkruan Fol Drejt.
Sipas njoftimit zyrtar ekspozita “Hapësira e Përpjekjes Politike: Miniera e Trepçës 1989”, e shoqëruar nga një hulumtim, është realizuar në partneritet ndërmjet Iniciativës për Histori Gojore dhe forumZFD programi në Kosovë, me mbështetje përmes fondeve të Ministrisë Federale Gjermane për Bashkëpunim Ekonomik dhe Zhvillim (BMZ) dhe National Endowment for Democracy (NED).
“Me 20 shkurt 1989, me ndryshimet kushtetuese pranë ratifikimit, minatorët e Trepçës hynë në grevë. Ata ishin të vendosur të mos largoheshin nga zgafella derisa të plotësoheshin kërkesat e tyre. Kërkesat e tyre nuk ishin sociale por politike dhe si të tilla kërkonin një zgjidhje politike.
Ekspozita “Hapësira e Përpjekjes Politike: Miniera e Trepçës 1989” niset nga përkushtimi për të kuptuar format e reja të angazhimit politik që gjetën artikulim gjatë grevës së minatorëve të organizuar nga 20 deri më 28 shkurt, 1989. Nëntoka ishte hapësira e përpjekjeve të tyre politike dhe lokacioni nga ku ata krijuan një marrëdhënie tjetër me atë që ishte duke ndodhur politikisht mbi tokë.
Ndërtimi i arkivit të hapur dhe të qasshëm me intervista të historisë gojore me minatorët e përfshirë në grevë ishte pikënisja e hulumtimit. Arkivi gjeneroi një shumësi zërash dhe këndvështrimesh që udhëzuan narrativën mbi ngjarjet që çuan drejt grevës, ndërsa bashkëbisedimet e detajshme me minatorët informuan konceptin e ekspozimit” – thuhet ndër të tjera në njoftim.
Po sipas njoftimit, ekspozita do të qëndrojë hapur nga 1 shkurt deri me 28 shkurt, 2023. Ajo është kuruar nga Erëmirë Krasniqi, ndërsa hulumtimi është kryer nga Renea Begolli, Anita Susuri, Korab Krasniqi dhe Erëmirë Krasniqi. Po ashtu, video montimi nga Renea Begolli dhe dizajni nga Nita Salihu Hoxha, Studio Permanent.
Ekspozita do të jetë e hapur, për këdo që është i interesuar./FolDrejt/
