Të dyshuarit kryesorë për rastin e vrasjes së trefishtë në Gllogjan i 26 nëntorit të vitit 2021, do të dalin para gjykatës më 24 maj, shkruan Fol Drejt.
Kështu tha për Klankosova.tv zëdhënësja e Gjykatës Themelore në Pejë, Tringa Zhuti.
Sipas Zhutit, seanca fillestare do të nisë më 24 maj në ora 10:00.
Ditë më parë në një konferencë për shtyp Prokurorja Saxhide Gashi njoftoi se është ngritur aktakuzë ndaj Kreshnik e Kastriot Mehmetajt, për veprën penale si bashkëkryes të vrasjes së rëndë.
Prokurorja e rastit Gashi, në konferencën e mbajtur për media deklaroi se aktakuza ishte ngritur edhe ndaj Halil Mehmetajt për veprën “shtytje në vrasje të rëndë”. Gashi po ashtu bëri të ditur se Malsor Mehmetaj, është liruar nga aktakuza për mungesë provash.
Prokurorja Gashi shtoi se vrasja ishte e planifikuar mirë dhe se targat kishte qenë shoferi i autobusit.
Ngjarja tragjike ndodhi më 26 nëntor të vitit 2021. Dy nxënës Genta Mustafaj dhe Ledion Hamzaj, bashkë me shoferin Gani Gjokaj mbetën të vrarë pasi dorasit shtinë në drejtim të tyre me një breshëri plumbash të shkrepur nga një kallashnikov, në një autobus i cili po bartte nxënës nga Gjakova në Deçan./FolDrejt/
