Zgjedhjet presidenciale në Maqedoninë e Veriut nuk janë të rëndësishme vetëm për politikën e brendshme, por edhe për atë se cilin orientim do marrë vendi, shkruan fillimisht prestigjiozja gjermane Frankfurter Allgemeine Zeitung.
Më tutje në shkrimin analitik të gazetës gjermane shkruhet se Stevo Pendarovski do të ishte garant i vazhdimit të integrimit të Maqedonisë së Veriut në strukturat euroatlantike, kurse kjo nuk vlen edhe për kundërkandidaten e tij nga radhët e OBRM-PDUKM – Gordana Siljanovska.
Fakti se socialdemokratët e Zoran Zaevit dhe partia e liderit të shqiptarëve të Maqedonisë, Ali Ahmeti, kanë arritur që njëzet vjet pas përfundimit të luftës pothuaj civile mes maqedonasve dhe shqiptarëve të kapërcejnë hendekun etnik dhe të fusin në garë një kandidat të përbashkët «është një shenjë inkurajuese për Maqedoninë e Veriut. Sepse për shkak të përbërjes së popullsisë ky shtet i Ballkanit ose ka një të ardhme multietnike, ose do të shpërbëhet», përcjell foldrejt.com.
Gordana Siljanovska akoma e quan vendin e saj Maqedonia dhe premton se nuk do njoh emrin e saj. Diçka që shkon kundër orientimit të vendit drejt strukturave euro-atlantike.
Nën hijen e Macronit dhe Erdoganit
Më tej media gjermane shkruan se Franca e Emanuel Macron vijon të mbetet e palëkundër kundër zgjerimit të BE dhe këtu mund të preket Maqedonia e Veriut e cila në fakt ka kryer shumë reforma dhe mbetet e pashpërblyer.
“Të gjithë kapitalin politik Zoran Zaev e ka investuar kundër izolimit të vendit. Nëse një shtet shembull për reforma si Maqedonia e Veriut nuk mer hapjen e negociatave në fund të qershorit, nuk do ishte fundi i karrierës politike të Zaevit, por një goditje e vërtetë kundrejt tij,” përcjell foldrejt.com.
Në lidhje me Turqinë e presidentit Rexhep Taip Erdogan, media shkruan se shtete si Bullgaria, Serbia, dhe Kosova kanë ekstraduar njerëzit e dyshuar për terrorizëm nga Gjykatat turke, dhe një sprovë të tillë pritet ta kalojë edhe Maqedonia e Veriut, ku ju kërkua zyrtarisht ekstradimi i 15 gylenistëve.
Erdogan duket se i kryen presion Maqedonisë së Veriut me NATO, pasi parlamenti turk është mes atyre që duhet të votojnë protokollin e anëtarësimit. Kuptohet arsyeja se pse Turqia nuk ka ratifikuar akoma protokollin formal.
Në fund media gjermane shkruan edhe për investitorët aktiv turq në vendin e vogël ballkanik dhe se kjo e fundit e ka vendosur në një situatë të rënduar qoftë nga hija e Erdoganit, qoftë edhe nga ajo e Macron-it. Në këto kushte nuk do ndryshojnë edhe zgjedhjet e 5 majit./foldrejt.com
