Ambasadori i Turqisë në Kosovë, Sabri Tunc Angili, ka dhënë së fundi një intervistë e cila ka bërë jehonë edhe në opinionin serb, shkruan Fol Drjet.
Angili tha së mbrami se dronët “Bajraktar TB-2” të dorëzuara në Kosovë nuk janë donacion dhe tha se janë të gatshëm të ofrojnë pajisje tjera shtesë nëse kjo është nevoja e Qeverisë së Kosovës.
Sipas tij dronët janë blerë dhe nuk janë dhuruar dhe këtë e ka thënë edhe Kryeministri Albin Kurti.
Ambasadori shtoi se Turqia është një partner strategjik i Kosovës dhe do të marrë pjesë në zhvillimin e të gjitha fushave, përfshirë mbrojtjen.
“Në Kosovë kemi bashkëpunim të zhvilluar dhe të rëndësishëm ekonomik. Investimet në Kosovë janë 10 për qind e investimeve tona në Ballkan. Vitin e kaluar Turqia u bë partneri numër një i Kosovës dhe ne duam të kemi bashkëpunim ekonomik dhe komercial, kjo është e rëndësishme për ne”, ka thënë Angili.
I pyetur nëse do të mbërrijnë drone të tjerë në Kosovë, diplomati turk tha se kjo “varet nga nevojat e Kosovës”.
“Kjo varet nga nevojat e Kosovës, por deri më tani më së shumti kemi bashkëpunuar me forcat e sigurisë së Kosovës përmes trajnimeve dhe kontakteve bilaterale. Kjo është ajo që ne fokusohemi më së shumti, por nëse Qeveria e Kosovës dëshiron ndonjë pajisje shtesë, atëherë Turqia dhe vendet e tjera të NATO-s do t’u përgjigjen këtyre nevojave. Deri më tani diçka e tillë nuk ishte në agjendën tonë”, tha ai.
Duket që këto kanë qenë deklarata që kanë zgjuar interes edhe në opinionin serb. Disa prej mediave serbe kanë cituar ambasadorin Angili, i cili nuk ka hezituar të shtoj se Turqia është e gatshme t’i ofrojë pajisje të çfarëdolloji Kosovës, po qe se kjo e fundit ia kërkon./FolDrejt/
