Pak më parë u raportua se në postimin e Presidencës Çeke në Twitter është vërejtur se në agjendë, mungon çështja e propozimit për liberalizimin e vizave për Kosovën, shkruan Fol Drejt.
Presidenca Çeke e ka konfirmuar se kjo temë (çështja e liberalizimit të vizave) është larguar nga rendi i ditës. Mediat nga Beogradi thonë se kjo është për shkak të tensioneve të fundit në veri të Kosovës, përkatësisht, për shkak të çështjes së pazgjidhur të targave.
Blic.rs i referohet një letre dërguar vendeve anëtare të BE-së, nga Presidenca Çeke:
“Për shkak të ngjarjeve politike në veri të Kosovës, nesër ajo pikë në agjendën e COREPER (ambasadorëve të BE-së) nuk duket ideale. Prandaj kemi vendosur që pikën ta shtyjmë për javën e ardhshme (30 nëntor).”
Siç është pritur, këtë të mërkurë, më 23 nëntor, është planifikuar të miratohet një tekst për liberalizimin e vizave në takimin e ambasadorëve të vendeve anëtare të BE-së, sipas të cilit heqja e regjimit të vizave do të hyjë në fuqi kur sistemi informativ ETIAS të jetë plotësisht funksional ose më së voni më 1 janar 2024.
Nga ana e Qeverisë së Republikës së Kosovës, ende nuk ka ndonjë reagim në lidhje me këtë çështje. Fol Drejt ka provuar të kuptojë nëse kjo shtyrje ndërlidhet me zhvillimet e fundit rreth çështjes së targave, por ende nuk ka marr përgjigje./FolDrejt/
