Mediumi serb “Danas” ka publikuar së fundi një artikull që flet për sulmin terrorist të grupit të armatosur në veri të Kosovës, ndaj autoriteteve të rendit. Ky artikull ngre shumë pyetje, shumica prej të cilave u adresohen autoriteteve serbe, shkruan Fol Drejt.
Sipas opozitares “Danas”, mbetet enigmatike çështja se kujt iu desh kjo luftë njëditore.
“As tri ditë pas konfliktit të armatosur në Banjskë, në Kosovë, ku mbetën të vrarë katër serbë dhe një polic i Kosovës, nuk është e qartë se çfarë ka ndodhur atje dhe kujt i duhej ajo luftë njëditore. Mbetën të hapura pyetje të shumta, të cilave nuk iu përgjigjën presidenti i Serbisë, Aleksandar Vuçiq dhe kryeministri i Kosovës, Albin Kurti, përgjigje të cilat opinioni do të duhej të merrte?
Mbetet e paqartë pse serbët përdorën kamionë për të bllokuar një rrugë rurale në të cilën normalisht nuk ka shumë trafik në orën tre të mëngjesit, afër manastirit ortodoks. Pse zgjodhën pikërisht atë natë kur presidenti i Serbisë ishte në aeroplanin nga Nju Jorku për në Beograd, por edhe momentin kur Kurti nuk ishte tamam personaliteti më popullor në Perëndim?
Nëse argumenti i Vuçiqit është i saktë se serbët u revoltuan sepse nuk mund të duronin më terrorin e Kurtit, pyetja është pse nuk e bënë më herët kur kishte shumë arsye më të drejtpërdrejta?
Mbetet e paqartë se kush e organizoi atë grup serbësh dhe nëse pas gjithçkaje, siç pretendojnë autoritetet kosovare, qëndron Milan Radoiçiq, nënkryetari i Listës Serbe, dhe për çfarë hesht Beogradi?
Është gjithashtu e paqartë se nga kanë ardhur kaq shumë armë, si kanë mbërritur në Banjska dhe pse policia e Kosovës dhe KFOR-i nuk e kanë ndalur as automjetin e blinduar me kohë, nëse tashmë kishin një video me dron?
I kujt ishte interesi që kishte të shtëna dhe pse KFOR-i nuk reagoi me kohë për herë të parë, edhe pse u është besuar mandati që të kujdesen për sigurinë dhe paqen në veri të Kosovës?
Është gjithashtu e paqartë pse zyrtarët serbë nuk i publikuan menjëherë emrat e serbëve të vrarë dhe pse u desh kaq shumë kohë që Lista Serbe të paktën të shprehte ngushëllime për familjet e viktimave?
E përse kanë dhënë deklaratë vetëm pasi është thirrur ambasadori gjerman në Kosovë, por pa asnjë fjalë duke mohuar se Milan Radoiçiq ka qenë një nga organizatorët e rebelimit në Banjskë? Mbetet e paqartë pse autoritetet kosovare nuk i kanë përmendur inicialet e serbëve të arrestuar, ndërsa mediat vendase kanë shkruar gjerësisht për këtë?
Gjithashtu mbeti e paqartë nëse strukturat serbe të sigurisë e dinin se serbët në Kosovë po përgatisnin një rebelim. Nëse nuk e dinin, lind pyetja nëse ato grupe u shkëputën nga kontrolli i Beogradit dhe u nisën për të zgjidhur konfliktet e tyre në mungesë të presidentit serb? Dhe nëse shërbimet e sigurisë e dinin se çfarë po ndodhte, a e kishin njoftuar me kohë presidentin e vendit?
Beogradi zyrtar, gjegjësisht presidenti i Serbisë, Aleksandar Vuçiq, nuk u ka dhënë përgjigje të gjitha këtyre pyetjeve në fjalimin e vetëm, do të thoshim me vonesë për publikun të dielën në mbrëmje. Pretendimi i tij se dëshira e Kurtit për të tërhequr serbët në luftë me NATO-n nuk është shpjegim i mjaftueshëm për atë që ndodhi në Banjska të dielën” – përfundon artikulli./FolDrejt/
