Ministri i Mbrojtjes, Armend Mehaj, ka thënë se kontingjenti i FSK-së po realizon me sukses të lartë operacionin e kërkim-shpëtimit në Turqi pas tërmeteve shkatërrimtare, raporton Fol Drejt.
“Kontingjenti i FSK-së në Republikën e Turqisë që nga orët e hershme të mëngjesit është duke operuar në provincën Hatay të Turqisë në mbështetje të autoriteteve turke për kërkimin dhe shpëtimin e jetërave të njerëzve nën gërmadha.”, shkroi Mehaj në Facebook.
Ai tha se specialistët e kërkim-shpëtimit urban dhe ekipet e mjekësisë emergjente dhe ata K9, të zbarkuar para dy ditësh në Republikën e Turqisë, me përkushtim dhe profesionalizëm të lartë janë duke zhvilluar operacionet e kërkim -shpëtimit në koordinim me autoritetet turke dhe ekipet e shpëtimit nga vende të ndryshme të botës.
“Rajoni Hatay në Turqi ku po operojnë njësitet tona është rajoni më i goditur.”, tha në fund të postimit të tij ministri Mehaj. /FolDrejt/
