Ministri i Mbrojtjes, Armend Mehaj, përmes një njoftimi në rrjetin social Facebook ka njoftuar se bashkia e Matit e ka nderuar me titullin “Qytetar Nderi”, shkruan Fol Drejt.
Ai ka falënderuar bashkinë e Matit për këtë vlerësim dhe ka mbajtur një fjalim të cilin mund ta lexoni më poshtë:
Faleminderit nga Bashkia Mat për këtë vlerësim që më keni dhënë.
Fjalimi im me rastin e pranimit të titullit “Qytetar nderi” i Bashkisë Mat.
I nderuar kryetar i Bashkisë, z. Agron Malaj,
I nderuar kabinet i kryetarit;
Këshilltarë të bashkisë;
Të nderuar Gjeneral të FARSH;
Të nderuar Gjeneral të FSK-së;
Të nderuar të pranishëm,
Është nder i veçantë për mua të jem sot këtu me ju, është gjithashtu emocion dhe privilegj. Falënderoj Kryetarin e Bashkisë, z. Agron Malaj për ftesën dhe për këtë nder që më keni bërë.
Unë për shkak të karrierës time ushtarake kam udhëtuar shumë nëpër botë, por e vetmja rrugë që nisem me gëzim është rruga drejt Shqipërisë, këtë ndjenjë besoj se nuk e kam vetëm unë, por secili shqiptar i Kosovës dhe, këtë gjë nuk do të mund ta ndryshoj askush, asnjëherë.
Ne para pak ditësh kemi përmbyllur manifestimin për Epopenë e UÇK-së, pra 5,6 dhe 7 marsin. Për tre ditë rresht familja Jashari luftoi heroikisht me forcat e ushtrisë çetnike serbe.
Një familje e tërë u sakrifikua për të mbrojtur nderin tonë dhe për të treguar që Kosova e jona ka qenë dhe e jona do të mbetet. Siç thoshte baca Hamëz :“Kjo tokë nuk e duron këmbën e shkjaut, këtu kemi lind dhe këtu do ta bëjmë vdekjen”.
Në krye të luftës tonë çlirimtare ishte komandanti Legjendar Adem Jashari, ai dhe shumë ushtarë të UÇK-së u stërvitën në Shqipëri, konkretisht në Burrel dhe derisa po vija rrugës e ndjeja se po i afrohesha komandantit tonë, po i afrohesha burimit të përgatitjes e organizimit të UÇK-së, qarkut të Bashkisë Mat, po i afrohesha Burrelit.
Këtë ndjenjë nuk mund ta përshkruaj, nuk mund t’i fsheh dhe as nuk dua t’i fsheh emocionet që kam.
Siç kam deklaruar në 100 vjetorin e pavarësisë së Shqipërisë, kur pranova medaljen nga shefi i shtabit të përgjithshëm të FARSH, z. Xhemail Gjunkshi që:” Unë jam nga Kosova dhe dashurinë për vendlindjen, për Shqipërinë dhe kombin shqiptar e kam të shenjtë. Unë i përulem me shpirt e zemër flamurit kombëtar”, këtë e them edhe sot këtu para jush.
Rrugëtimi ynë drejt lirisë dhe shtetësisë ka kaluar pikërisht përmes jush, përmes këtij vendi ku jemi sot. Sot 25 vite pas, jemi sërish këtu në këtë vend me të cilin e kaluara dhe e ardhmja jonë është e lidhur ngushtë.
Në emrin tim dhe në emër të shqiptarëve të Kosovës, ju falënderoj përzemërsisht. Atë që keni bërë për ne, nuk e harrojmë asnjëherë
Për fund, dua t’iu përgëzoj për punën që keni bërë dhe po bëni në shërbim të qytetarëve këtu, në përmirësimin e jetës dhe kushteve të tyre.
Uroj që t’iu shërbejmë më përkushtim dhe përulësi gjithmonë sepse këta njerëz meritojnë shumë.
Vizitojeni sa më shumë dhe sa më shpesh Kosovën, ne ju presim me krahë të hapur gjithmonë.
Faleminderit të gjithëve, është vërtetë nder për mua që më keni dhënë titullin “Qytetar nderi”.
Faleminderit! /FolDrejt/
