Ministri i Mbrojtjes, Armend Mehaj, ka njoftuar se ka marrë pjesë në një takim virtual me Komisionin e Përgjithshëm për Drejtësinë, Çështjet e Brendshme dhe Sigurinë e shteteve të Evropës Juglindore në Procesin e Bashkëpunimit ndërmjet këtyre shteteve, ku është diskutuar mbi disa tema të rëndësishme të nxitura nga situata aktuale gjeopolitike dhe pushtimi i paprovokuar rus në Ukrainë, shkruan Fol Drejt.
“Në një takim virtual me Komisionin e Përgjithshëm për Drejtësinë, Çështjet e Brendshme dhe Sigurinë e shteteve të Evropës Jug-lindore në Procesin e Bashkëpunimit ndërmjet këtyre shteteve, diskutuam mbi disa tema të rëndësishme të nxitura nga situata aktuale gjeopolitike, pushtimi i paprovokuar rus në Ukrainë, që në mënyrë direkte ka ndikuar në strategjitë e shteteve dhe format e bashkëpunimit, domosdoshërinë e unitetit si formë e vetme e mbrojtjes së vlerave demokratike përballë shteteve autokrate me tendenca ekspanzioniste.”, shkroi Mehaj në Facebook.
Mehaj theksoi se duke qenë dëshmitar të sulmeve të vazhdueshme ruse në Ukrainë dhe luftës hibride ruse me target Ballkanin, zgjerimi i NATO-s është zgjidhja për të siguruar stabilitet, që së bashku me investimet strategjike në fushën e mbrojtjes dhe zhvillimit të gjithmbarshëm ekonomik, do të mundësojë zgjidhjen edhe të krizës së refugjatëve e ruajtjen e paqes ndërmjet kombeve.
“Në këtë aspekt Kosova mbetet e përkushtuar në përkrahjen e politikave perëndimore, aleancës ndërmjet shteteve, dhe mbështetjen e partnerëve tanë strategjik,” u shpreh Mehaj në fund. /FolDrejt/
