Reagimet e shumta rreth përgjimit ku dëgjohet Mimoza Kusari Lila duke biseduar me një përfaqësues të Listës Serbe, kanë vërshuar rrjetet sociale. Kritikët po thonë se me këtë u zhvesh nga petku i patriotizmit një subjekt që s’është në thelb më shumë se sa populist. Por prej nga erdhën dhe si erdhën këto përgjime? Pastaj, a u diskreditua në të vërtetë Lëvizja Vetëvendosje me këtë rast?
Nga Fol Drejt
Ishte Gazeta “Nacional” e drejtuar nga Berat Buzhala ajo që i nxori në shesh këto përgjime. Figura e këtij të fundit jo rrallë herë është akuzuar për lidhje me Beogradin. Eksponentë të partisë në pushtet, shpesh e kanë cilësuar si “pro Vuçiqit” dhe “kundër Kosovës”, dhe sidomos si një njeri që u shërben oligarkëve. Vetë Buzhala, në një intervistë të dhënë për emisionin televiziv “Me Shukin”, e realizuar në vitin 2015 pranonte se kishte investuar në veri të Kosovës, duke mos e mohuar se kishte bërë biznes me serbët e veriut:
“Qyre, ajo u kanë aventura ma fatkeqe, edhe atë e pranoj… e jemja… ka qenë një dëshirë me investu në pjesën veriore… nën njo s’jon kanë pare të mia, ato i kanë investu Buja dhe Akani, janë kanë dikun nja 3, 4 milion euro” – thotë ai në këtë intervistë.
Se konteksti i pasluftës në Kosovë kishte krijuar një shtresë biznesmenësh që kishin lidhje me politikanë e kriminelë, e tregojnë edhe disa burime të tjera. Një raport i përpiluar nga BND-ja gjermane, menjëherë pas luftës, dokument i cili është përmendur në mënyrë ekskluzive nga Fol Drejt, e thotë shumë qartë këtë.
Nga një perspektivë tjetër, por jo më pak të rëndësishme, flet edhe reportazhi i New York Time-s kushtuar figurës kontraverse të Aleksandër Vuçiqit, përkatësisht, kontrollit të këtij të fundit që ka mbi grupet kriminale serbe që veprojnë në veri.
POR PËRMBAJTJA E BISEDËS – PËRGJIMIT ËSHTË E RËNDËSISHME, DHE JO BURIMI
Më 2013 në Bruksel Kosova dhe Serbia merren vesh për shuarjen e strukturave paralele, përkatësisht, integrimin e tyre në institucionet e Kosovës. Ndonëse kjo marrëveshje nuk u zbatua kurrë në tërësi, policë serbë dhe struktura të tëra të MUP-it që besohej se vepronin në veri, shfrytëzuan rastin të integrohen në strukturat e sigurisë së Kosovës, çka rezulton të ishte një gabim shumë i madh i politikës së kohës.
Pikërisht këto struktura të pashuara sot mbahen përgjegjëset kryesore për eskalimin e situatës në veri të vendit.
Lëvizja Vetëvendosje! Ka prolonguar për një kohë të gjatë një standard shumë të lartë, i cili për rrethanat e sotme mund të cilësohet si surreal.
Dikur si opozitar, lideri i partisë në fjalë – Albin Kurti, tani Kryeministër i Republikës, praninë e Listës Serbe në Kuvendin e Kosovës e quante fatkeqësi, ndërsa nuk e përjashtonte mundësinë e komunikimit me ta, pikërisht për faktin se ishin pjesë e kuvendit:
“Para se të arrijmë tek Lista Serbe, ne kemi serbët e tjerë që janë politikanë, përfaqësues, të cilët e pranojnë pavarësinë e Kosovës, e njohin republikën tonë dhe e respektojnë Kushtetutën dhe ligjet e vendit tonë. Prandaj nuk mund të shkojmë te Lista Serbe pa takuar e kontaktuar e bashkëpunuar me këta serbë që janë autentik në përfaqësim dhe jashtë diktatit të Beogradit në veprim” – thoshte ai atëbotë në një intervistë për Anadolu Agency-në (AA).
Përgjimi, ku dëgjohet zëri i Shefes së Grupit Parlamentar të Vetëvendosjes! Mimoza Kusari Lila, nuk shpërfaq diçka specifike, përpos, uljes së standardeve elektorale të premtimeve, që sot duken vështirë të implementueshme.
“Jo, nuk është e vërtetë absolutisht, jo. Kurdo e ballafaqoj publikisht, kurdo mundem me e konfirmu kjo biseda e shkurtër 3-minutëshe në gjuhën shqipe në interfon në zyrën time, ka qenë vetëm një herë kjo bisedë, asnjëherë tjetër nuk ka pas as komunikim, as koordinim” – tha ajo në një intervistë për RTV Dukagjinin.
Përtej përplasjeve e spekulimeve, një fakt mbetet i pandryshuar: Lista Serbe ka muaj që tashmë nuk është pjesë e kuvendit dhe vendimi për t’u tërhequr nga legjislatura aktuale, ka të bëjë pikërisht me qëndrimet dhe veprimet e Qeverisë Kurti, në pjesën e veriut të vendit.
Por pavarësisht këtij fakti kokëfortë, analistë, politikanë, e madje edhe subjekte politike opozitare, e shfrytëzuan rastin në fjalë, për t’u pozicionuar më mirë në skenën politike:
“ Për të vërteten dhe faktimin e saj, ne shprehim mirënjohjen. Për gjendjen e rëndë të politikëbërjes në Kosovë, LDK -ja shpreh shqetësimim më të thellë.
Sepse, koordinimi i aktiviteteve politike në vend, sikurse dhe komunikimi me një person me urdhërarrest e në listë të zezë të SHBA-ve, cënon rëndë sigurinë e Republikës së Kosovës” – u tha ndër të tjera në një reagim të Lidhjes Demokratike të Kosovës (LDK).
Kryetari i Partisë Demokratike të Kosovës (PDK), Memli Krasniqi, nxiti reagime me një status të publikuar në llogarinë e tij në Facebook, duke shkruar kësisoj:
“Albin, me Milan Radojçiqin, a me koordinim a pa koordinim?”
EDHE NJË DITË E HARROHET GJITHÇKA
Le ta injorojmë për një çast të kaluarën, t’i kthehemi realitetit: a janë të gatshme partitë opozitare të cilat po e akuzojnë Lëvizjen Vetëvendosje!, për premtime boshe, për populizëm, t’i injorojnë politikanët e Listës Serbe? A është dashur krerët e Vetëvendosjes, të distancohen nga veprimet e shefes së grupit parlamentar të kësaj partie? A është dashur kjo e fundit të heq dorë, si akt moral, nga kjo pozitë (të paktën)?
Biseda me Radojçiqin, në fakt, nuk e rikthen pushtetin politik të Listës Serbe në Kosovë. As nuk i liron kriminelët e arrestuar, figura të shquara të nëntokës në veri të vendit. As nuk e dorëzon Qeverinë Kurti kundrejt tendencave destabilizuese në veri, por ia dobëson imazhin kësaj të fundit.
Për këtë duket se janë të bindur edhe kundërshtarët e Albin Kurtit. Duke qenë të pafuqishëm për ta rrëzuar nëpërmjet votës së mosbesimit në kuvend dhe të vetëdijshëm për imazhin e tij të fuqizuar, shkaku i veprimeve në veri, kanë shfrytëzuar rastin për adresimin e kritikave dhe akuzave, pas publikimit të përgjimit.
I vetmi mëkat i Kusari Lilës, duket të jetë pikërisht ky: dëmtimi i imazhit të Vetëvendosjes!
Titujt e sojit: “Çfarë u fol për Radojçiçin? Publikohet audio-përgjimi mes deputetes së Vetëvendosjes me atë të Listës Serbe” – e dëshmojnë këtë tendencë.
Në debatin rreth video-përgjimit, u involvua në një mënyrë edhe Ambasadori i Shteteve të Bashkuara në Kosovë, Jeffrey Hovenier i cili u shpreh shkurt dhe thjesht:
“Nuk mund të flas shumë për këtë, liderët politikë në Parlament kanë komunikim me të gjithë palët. Por Radojiçiq ju e dini se është në listë të zezë të ShBA-ve”, tha ai./FolDrejt/
*Fotografia e përdorur në ballinë, është e modifikuar. Është një sarkazmë e qëllimshme, e redaksisë.
