Kryetari i Partisë Demokratike të Kosovës (PDK) Memli Krasniqi në fjalën e tij në Kuvendin e Kosovës, tha se seanca e sotme nuk duhet të shihet si përplasje e “akuzë” për procesin, por thjesht si një shans për informim të qartë e të drejtpërdrejt për procesin, shkruan Fol Drejt.
I pari i PDK-së tha se tashmë “teknikisht po e shohim se ka pasur lëvizje në dialog”, mirëpo procesi po karakterizohet nga një terr informativ. Gjithsesi, sipas tij, kjo seancë nuk është ftuar dhe nuk e ka karakterin e përplasjes e akuzës.
Ai e ka treguar pozicionin e PDK-së në lidhje me procesin duke thënë se e ka parë me sy pozitiv involvimin e bashkësisë nsërkombëtare në proces dhe tha se “e kemi inkurajuar qeverinë që të bashkëpunojë me ta.”
Ai parashtroi disa pyetje kyçe në lidhje me procesin, përgjigjet ndaj të cilave, sado-kudo, do të hedhin dritë mbi procesin:
“Së pari: Çka është qëllimi i propozimit Evropian?, a ofron ky propozim mundësinë e arritjes së marrëveshjes finale? Ligjërisht dhe ndërkombtarisht obligative për palët? Apo vetëm krijimin e një statusquoje të re, e cila e zëvendëson statusquonë aktuale? A është ky propozim vazhdimësi e dialogut të deritashëm, apo një pikënisje e një procesi të ri? Cila është korniza kohore për arritjen apo mosarritjen e marrëveshjes potenciale? A është formati i këtij propozimi një lloj traktati që i njeh si entitete sovrane edhe Kosovën edhe Serbinë? A e ofron prpopozimi një kornizë kohore të saktë se kur ndodh njohja e ndërsjellë?
Së dyti: Cili është teksti i fundit dhe përmbajtja zyrtare e këtij propozimi? A e keni pranuar këtë tekst në parim dhe sa besoni se mund të ndryshojë teksti final, prej versionit që keni deklaruar se e pranoni si bazë të mirë? A e ofron propozimi një kornizë kohore të saktë, se kur ndodh njohja e ndërsjellë? Sa ka arritur qeveria t’i përfshijë komentet dhe sugjerimet e veta në versionin e fundit të tekstit;
Së treti: Kush janë garantuesit e marrëveshjes që mund të arrihet nëpërmjet këtij propozimi? A keni garancione nga parterët ndërkombëtarë se Kosova do të njihet nga pesë shtetet mosnjohëse të Bashkimit Evropian, në rast se arrihet marrëveshja? Cilat do të jenë karotat për Kosovën në rast se arrihet marrëveshja? Dhe cilët do të jenë shkopinjtë, në rast se marrëveshja nuk arrihet. A ua keni kumtuar 6 kushtet për themelimin Asociacionin partnerëve ndërkombëtarë dhe nëse ato nuk pranohen, a do të tërhiqeni prej ndonjërit prej atyre kushteve? Dhe a parashihet vazhdimi i dialogut në Bruksel, edhe pasi të arrihet marrëveshja?”/FolDrejt/
