Kompania Meta, e cila zotëron Facebook, Instagram dhe WhatsApp, ka njoftuar se do të pushojë nga puna deri në 10 mijë punonjës, shkruan Klix, përcjell Fol Drejt.
Do të jetë vala e dytë e pushimeve nga puna te Meta, e cila largoioi 11 mijë punonjës në nëntor 2022. Drejtori i Përgjithshëm i Metës, Mark Zuckerberg, tha se vendimi ishte i vështirë, por se ishte pjesë e “vitit të efikasitetit”. Përveç 10,000 vendeve të punës të ndërprera, 5,000 pozicione të hapura në kompani do të mbeten të paplotësuara.
Në një fjalim drejtuar punonjësve, Zuckerberg deklaroi se ai beson se kompania mori një “thirrje zgjimi” në vitin 2022 kur të ardhurat u ulën. Ai përmendi normat më të larta të interesit, paqëndrueshmërinë gjeopolitike globale dhe rritjen e rregullave si disa nga faktorët që ndikojnë tek Meta.
“Unë mendoj se duhet të përgatitemi për mundësinë që ky realitet i ri ekonomik të vazhdojë edhe në vitet e ardhshme”, tha Zuckerberg.
Shkurtimet vijnë pasi kompanitë përfshirë Google dhe Amazon luftojnë për të balancuar masat e uljes së kostove me nevojën për të mbetur konkurrues.
Në fillim të vitit, Amazon njoftoi eliminimin e më shumë se 18,000 vendeve të punës për shkak të “ekonomisë së pasigurt” dhe punësimeve të shpejta gjatë pandemisë së koronavirusit, ndërsa kompania mëmë e Google, Alphabet pushoi nga puna 12,000 punonjës.
Deri më tani këtë vit, më shumë se 128,000 njerëz janë pushuar nga puna në industrinë e teknologjisë. /FolDrejt/
