Më 1 qershor, SHBA dhe Tajvani njoftuan synimet e tyre për zhvillimin e një udhërrëfyesi ambicioz për negociatat nën Iniciativën SHBA-Tajvan për Tregtinë e Shekullit 21.
SHBA-ja ka njoftuar se ka rënë dakord të nisë negociatat zyrtare rreth një kornize tregtare dypalëshe me Tajvanin në fillim të vjeshtës, mes tensioneve tashmë të larta me Kinën mbi statusin e vendit ishull, shkruan AA, transmeton Fol Drejt.
“SHBA dhe Tajvani, nën kujdesin e Institutit Amerikan në Tajvan (AIT) dhe Zyrës së Përfaqësisë Ekonomike dhe Kulturore të Taipeit në SHBA (TECRO), sot kanë arritur konsensus mbi mandatin e negociatave për Iniciativën SHBA-Tajvan për Tregtinë e Shekullit të 21-të e shpallur më 1 qershor 2022”, thuhet në deklaratën e Zyrës Përfaqësuese të Tregtisë së SHBA-së.
Deklarata shton se mandati përcakton objektivat e gjera të përbashkëta nga të dyja palët për negociatat e ardhshme tregtare, të cilat pritet të nisin “në fillim të kësaj vjeshte”.
“Planifikojmë të ndjekim një plan ambicioz për arritjen e angazhimeve të standardeve të larta dhe rezultateve domethënëse që mbulojnë njëmbëdhjetë fushat tregtare në mandatin e negociatave që do të ndihmojnë në ndërtimin e një ekonomie më të drejtë, më të begatë dhe më elastike të shekullit të 21-të”, tha zëvendës Përfaqësuesja Tregtare e SHBA-së Sarah Bianchi.
Më 1 qershor 2022, nën kujdesin e AIT dhe TECRO, SHBA-ja dhe Tajvani njoftuan synimin e tyre për zhvillimin e një udhërrëfyesi ambicioz për negociatat nën Iniciativën SHBA-Tajvan për Tregtinë e Shekullit 21.
Ushtria kineze ka zhvilluar manovra masive ushtarake që nga fillimi i këtij muaji, menjëherë pasi kryetarja e Dhomës së Përfaqësuesve të SHBA, Nancy Pelosi realizoi, vizitën e saj të paparalajmëruar në Tajvan, të cilin Pekini e sheh si “provincën e saj të shkëputur”.
Megjithëse Pelosi dhe administrata e presidentit Joe Biden përsëritën qëndrimin e SHBA-së ndaj politikës së “Një Kine”, autoritetet kineze vizitën e konsiderojnë si sfidë të rrezikshme të status quo-së.
Pekini dënoi vizitën, sanksionoi Pelosin dhe familjen e saj dhe uli dialogun ushtarak me SHBA-në, përveç marrjes së disa kundërmasave të tjera.
Megjithatë, të dielën e kaluar, 12 ditë pas udhëtimit të Pelosit, një tjetër delegacion i ligjvënësve amerikanë zbarkoi në Taipei ku u takuan me Presidenten e Tajvanit, Tsai Ing-wen, me të cilën biseduan për sigurinë dhe zinxhirin e furnizimit./FolDrejt/
