Ambasada e ShBA-së reagoi pasi Presidenti i Republikës Sërpska Milorad Dodik e mohoi sërish gjenocidin në Srebrenicë raporton Klix, përcjell Fol Drejt.
“Presidenti Dodik e ka gabim, si gjithmonë, kur pretendon se gjenocidi nuk ka ndodhur në dhe rreth Srebrenicës në korrik 1995. Faktet e kësaj tragjedie mbështeten nga prova të qarta mjeko-ligjore dhe prova të tjera dhe janë vërtetuar pa asnjë dyshim nga gjykatat ndërkombëtare: elementë të ushtrisë Republika Sërpska, nën komandën e Ratko Mlladiqit dhe direktivën politike të Radovan Karaxhiqit, kryen gjenocid dhe ata janë kriminelë lufte”, thuhet në reagimin e ambasadës.
Siç theksojnë ata, për këtë dhe krimet e tjera të luftës të kryera gjatë luftës së viteve 1992-1995, fajin e kanë autorët, jo një grup i tërë etnik. Mohimi i përsëritur i gjenocidit në Srebrenicë nga Dodik nuk mund t’i ndryshojë këto fakte, theksohet.
“Komentet e vrazhda, paragjykuese për Srebrenicën dhe tema të tjera të ndjeshme nuk i ndihmojnë qytetarët e Republikës Sërpska. Ato janë një përpjekje për të larguar vëmendjen nga fushata aktuale për të privuar popullin e Republikës Srpska nga liritë themelore; nga dështimi për të zgjidhur çështjet e përditshme. që më së shumti shqetësojnë banorët e Republika Sërpska si rritja e çmimeve dhe huamarrja e papërgjegjshme publike që e vendos të ardhmen e Republikës Srpska nën hipotekë”, thuhet në reagimin e ambasadës amerikane.
Ata theksojnë se nuk mund ta pengojnë Dodikun “të vazhdojë të turpërojë veten dhe Republikën Sërpska, por Shtetet e Bashkuara do të vazhdojnë t’i përgjigjen mohimeve të gjenocidit.”
“Ne gjithashtu do të vazhdojmë të mbështesim dhe bashkëpunojmë me qytetarët e Bosnjë dhe Hercegovinës, duke përfshirë ata që jetojnë në Republika Srpska, ndërsa ata punojnë për të ndërtuar një të ardhme paqësore, demokratike dhe të begatë për veten e tyre brenda komunitetit euro-atlantik të kombeve,” përfundoi ambasada. /FolDrejt/
