Ministri i Jashtëm dhe i Tregtisë së Hungarisë, Peter Szijjarto tha se Togg është treguesi më i mirë se sa është zhvilluar ekonomia turke dhe se populli turk me të drejtë mund të jetë krenar, raporton AA.
Szijjarto ndodhet në Türkiye me rastin e hapjes së Medicor Medical, investimi i ri i vendit të tij në Türkiye dhe me këtë rast iu përgjigj pyetjeve të gazetarit të AA.
I pyetur për rezervat e Hungarisë për mos ratifikimin e anëtarësimit të Suedisë në NATO, Szijjarto tha se ky proces miratimi është vendim i parlamentit dhe se qeveria e ka informuar parlamentin për qëndrimet e saj pozitive.
I pyetur për procesin e anëtarësimit të Turqisë në Bashkimin Evropian (BE), Szijjarto rikujtoi se aktualisht nuk ka konsensus për Türkiye-n në BE.
“Për shkak se disa vende nuk kanë guximin të thonë hapur pikëpamjet e tyre ballë për ballë, ata i thonë gjërat me dyer të mbyllura. Disa vende janë seriozisht kundër përshpejtimit të procesit të pranimit të Turqisë. Në këto kushte, ne si Hungari duam të krijojmë bashkëpunimin më të mirë mes BE-së dhe Turqisë”, tha Szijjarto.
Duke potencuar se vendi i tij është një nga vendet më të prekura nga lufta për shkak të fqinjësisë me Ukrainën, ministri theksoi rëndësinë e rolit të Turqisë në këtë fushë.
“Përpjekja e vetme e suksesshme për ndërmjetësim ishte marrëveshja e grurit e nënshkruar nga Turqia, nga vet presidenti Erdogan. Palët në konflikt janë kontraktuar që nga shpërthimi i luftës. Marrëveshja e vetme e rëndësishme që palët në konflikt arritën të lidhnin që nga fillimi i luftës ishte kjo marrëveshje e grurit. Prandaj, ne besojmë se Turqia duhet të luajë rolin kryesor në periudhën e ardhshme, kur të krijohen kushtet për negociatat e paqes”, tha Szijjarto, duke shtuar:
“Për këtë arsye, ne shpresojmë që qeveria turke të vazhdojë të punojë dhe të kontribuojë për paqen botërore”.
Szijjarto foli edhe për automjetin vendor turk Togg.
“Fakti që Turqia mund të prodhojë automjetin e saj tregon se sa është zhvilluar ekonomia turke, sepse industria kombëtare e automjeteve tregon se ekonomia është në një nivel tjetër”, tha Szijjarto, duke shtuar: “Jemi të vetëdijshëm se çfarë përpjekje nevojiten për të arritur deri në pikën ku është Turqia. Për këtë arsye, populli turk me të drejtë mund të jetë krenar”.
Ai shtoi se me homologët e tij turq, për sa i përket Togg-ut turk, kanë shqyrtuar futjen e tij edhe në tregun hungarez dhe se beson se Togg mund të konkurrojë me markat e tjera.
Në fund ai i uroi presidentit turk Erdogan suksese në zgjedhjet e ardhshme, transmeton Fol Drejt.
