Ministri i Mbrojtjes, Armend Mehaj, së bashku me ambasadorin e ShBA-së në Kosovë, Jeffrey Hovenier, kanë pritur sot në një takim senatorin amerikan Gary Peters, me të cilin kanë diskutuar situatën gjeopolitike, raporton Fol Drejt.
“Sot bashkë me ambasadorin e ShBA-së, Jeffrey Hovenier, prita në takim senatorin Gary Peters, me të cilin diskutuam për situatën aktuale gjeopolitike, luftën në Ukrainë, kontributin e ofruar nga Kosova si pjesë e Grupit të Kontaktit për Mbrojtjen e Ukrainës, e po ashtu gjatë takimit theksova faktin e mbështetjes që Rusia gjenë nga Serbia në Ballkan, si i vetmi shtet që në vazhdimësi ka përkrahur politikat proruse dhe refuzon të vendos sanksione ndaj këtij agresori.”, shkroi Mehaj në Facebook.
Mehaj theksoi se ka njoftuar senatorin Peters për zhvillimet në Kosovë, procesin e dialogut me Serbinë, si dhe avancimet e Forcës së Sigurisë së Kosovës në implementimin e Planit Gjithpërfshirës të Tranzicionit, bashkëpunimin me partnerët strategjikë, e po ashtu për ushtrimin ndërkombëtar që po zhvillohet në Kosovë, Defender Europe ’23, si shembull konkret që dëshmon ngritjen e kapaciteteve të Forcës së Sigurisë së Kosovës për të siguruar ruajtjen e paqes dhe stabilitetit në vend, rajon dhe më gjerë.
Në anën tjetër senatori Peters shprehu vlerësimin e tij të lartë për avancimet që Kosova ka bërë jo vetëm në fushën e sigurisë dhe mbrojtjes por gjithashtu në mirëqeverisjen e vendit në shumë drejtime, duke dëshmuar qëndrimin pro vlerave perëndimore dhe pro NATO-s, aleancës që stoikisht mbështetë ruajtjen e paqes dhe pavarësisë së shteteve.
“ShBA është aleati ynë strategjik me të cilin na bashkon e kaluara dhe e ardhmja të cilën do e ndërtojmë, me Kosovën si pjesë e BE dhe NATO-s.”, shtoi në fund Mehaj. /FolDrejt/
