Ministri i Drejtësisë, Armend Mehaj, ka vizituar familjen e dëshmorit Besnik Lajqi nga Peja, ku edhe vlerësoi lart angazhimin e tij si student dhe si ushtar i UÇK-së për çlirimin e Kosovës, transmeton Fol Drejt.
“Gjendja e shqiptarëve nën regjimin serb ishte e rëndë, studentët filluan organizimet e tyre kundërshtuese nda regjimit, Besniku ishte pjesëmarrës në të gjitha protestat dhe demonstratat që zhvilloheshin kundër përndjekjes, burgosjeve, vrasjeve dhe terrorit që Serbia ushtronte mbi shqiptarët.”, shkroi Mehaj në Facebook.
Mehaj theksoi se më vonë, kur Ushtria Çlirimtare e Kosovës doli në skenë, ai veshi uniformën dhe më nuk iu nda kurrë rezistencës së armatosur deri në rënien e tij heroike. Ai gjithashtu ishte njohës i mirë i terrenit, prandaj edhe kishte detyrën e furnizimit me armatim të ushtrisë sonë, armatim ky që e sillnin nga Shqipëria.
“Në luftën çlirimtare, Besniku tregoi guxim e vendosmëri të lartë, ai ra heroikisht në mbrojtje të atdheut. Lufta për liri do të mbetet gjithmonë krenaria jonë më e madhe, falë së cilës në arritëm lirinë.
Lavdi Besnikut dhe gjithë deshmorëve të kombit!”, u shprej tutje Mehaj. /FolDrejt/
