Ministri i Punëve të Brendshme Xhelal Sveçla, ka zbuluar identitetin e të arrestuarit të fundit nga Policia e Kosovës. Sipas ministrit Sveçla bëhet fjalë për Urosh Vukasinoviqin, i cili, së bashku me të tjerët, po merr urdhra specialë nga Beogradi, shkruan Fol Drejt.
“Tre ditët e fundit, tre të arrestuar për sulmet brutale dhe kriminale ndaj gazetarëve që raportojnë nga veriu i vendit. I arrestuari i tretë, i rradhës, është Urosh Vukasinoviq.
Këta kriminelë, të cilët po marrin urdhra për këto sulme nga Beogradi, tashmë do të përballen me drejtësinë. Nuk do të ndalemi, çdo përgjegjës për dhunën dhe aktet kriminale ndaj gazetarëve, do të arrestohet” – ka shkruar Sveçla.
Ministri Sveçla ka thënë se nuk do të lejojnë askënd t’i sulmojë qytetarët. Për këtë, sipas tij, Kosova është shembull i funksionimit të demokracisë.
“Republika e Kosovës është vend shembull i funksionimit të demokracisë, dhe nuk do të lejojmë askënd, me asnjë çmim të sulmojë qytetarët, të frikësojë raportimin e gazetarëve dhe cenojë rendin tonë kushtetues.”/Fol Drejt/
