Ndonëse bibliotekat duhet të kenë objektet e tyre në ambiente të qeta dhe larg zhurmave të vazhdueshme, biblioteka e Mitrovicës në vijimësi përballet me një problem të tillë. Biblioteka e Mitrovicës vazhdon të veproj në qendër sportive e në mungesë të objektit të saj.
Nga Gëzim Olluri – Fol Drejt
Sipas një hulumtimi rreth gjendjes së bibliotekave publike në Kosovë, burime nga biblioteka e Mitrovicës kohë më parë kanë thënë që mungesa e objektit për bibliotekë dhe vendosja në qendër sportive është duke e vështirësuar veprimtarinë e bibliotekës ndër vite. Zhvendosja e bibliotekës është bërë dy herë dhe pa zgjidhje të vërtetë nga ana e institucioneve qendrore e lokale.
“Çka më shumë na brengosë është ndërtimi i një objekti për bibliotekë pasi që dihet se nga viti 2011 jemi zhvendosur dy herë përkohësisht në objekte të ndryshme dhe që nuk janë adekuate për veprimtarinë e bibliotekës. Aktualisht biblioteka gjendet në qendrën sportive multifunksionale OMNISPORT”, thonë burime nga biblioteka e Mitrovicës.
Sipas burimeve nga Mitrovica, së shpejti pritet ndërtimi i objektit të ri për bibliotekën në qendër të qytetit pasi është planifikuar edhe përmes buxhetimit. Rreth çështjes së bibliotekës, “Fol Drejt” i ka dërguar kërkesë me shkrim kryetarit të Mitrovicës, Bedri Hamzës, mirëpo në vend të kryetarit është përgjigjur, Valon Hetemi, shef i kabinetit të kryetarit në Mitrovicës.
“Po iu njoftojmë se jemi në proces të projektit të hartimit kryesor detaj dhe ideor sipas ligjeve në fuqi të ndërtimit në Republikën e Kosovës për objektin e ri të Bibliotekës. Ky objekt do të ndërtohet në qendër të qytetit dhe është i planifikuar në buxhetin 2023-2025”, ka shkruar Hetemi.
“Fol Drejt” iu ka dërguar kërkesë me shkrim edhe Ministrisë së Kulturës për t’i pyetur nëse do të ofrojnë bashkëpunim ose ndihmë financiare rreth bibliotekës për Komunën e Mitrovicës, por nuk kanë dhënë përgjigje.
Kujtojmë se gjatë luftës së viteve 1998-1999 në Mitrovicë, dy biblioteka janë shkatërruar nga ushtria kriminale serbe, bëhet fjalë për bibliotekën e Tunelit të Parë dhe atë Trepçës. Aktualisht, sipas të dhënave statistikore nga Agjencia e Statistikave të Kosovës (ASK) për vitin 2021, në bibliotekën e Mitrovicës gjenden 78 mijë e 774 libra./FolDrejt/
