Ministria e Kulturës, Rinisë dhe Sportit (MKRS) në krye me ministrin Hajrulla Çeku nga radhët e Lëvizjes Vetëvendosje (LVV) ka dhënë donacion 901 ekzemplarë dhe 400 tituj të rinj librash për Bibliotekën e qytetit në Lipjan, shkruan Fol Drejt.
Nga Gëzim Olluri – FolDrejt
Drejtoresha për Kulturë, Rini dhe Sport në Lipjan, Anila Reçica-Llugiqi ka theksuar rëndësinë që biblioteka e qytetit të pasurohet me tituj dhe libra të rinj. Sipas drejtoreshës Reçica-Llugiqi në këtë mënyrë lexuesit mund të kenë më shumë alternativa të zgjedhin tituj të rinj nga literatura vendore dhe ndërkombëtare.
“Është shumë e rëndësishme që biblioteka e qytetit në vazhdimësi të pasurohet me tituj dhe libra të rinj dhe në këtë drejtim po pasurohet jo vetëm biblioteka, por edhe lexuesi lipjanas, i cili do të ketë më shumë zgjidhje” thuhet në shkrimin e Reçica-Llugiqit në web faqen zyrtare të Komunës së Lipjanit.
Sipas informacioneve nga Biblioteka e Lipjanit, biblioteka para donacionit nga MKRS kishte 52 mijë e 698 libra bashkë me dy bibliotekat në Gadime dhe Shalë. Njëra nga mungesat e kësaj biblioteke sipas burimeve nga biblioteka e Lipjanit është mungesa e digjitalizimit.
Kujtojmë që në luftën gjenocidale nga Serbia më 1998-1999, të gjitha librat dhe literatura shqipe e bibliotekës së Lipjanit janë shkatërruar nga ushtria kriminale serbe në fabrikën e letrës në Lipjan./FolDrejt/
