Kryeministri përmendi rreziqet për sigurinë energjetike, sigurinë e kufijve të vendit dhe nevojën për të menaxhuar flukset e refugjatëve.
Parlamenti i Moldavisë votoi sot për të zgjatur gjendjen e jashtëzakonshme të shpallur në vend edhe për 60 ditë të tjera, pasi qeveria tha se kishte ende nevojë për fuqi të zgjeruara për t’u marrë me ndikimin e pushtimit rus në Ukrainë, shkruan protothema, transmeton Fol Drejt.
Kryeministrja Natalya Gavrilitsa përmendi rreziqet e vazhdueshme për sigurinë energjetike, sigurinë e kufijve të vendit dhe nevojën për të menaxhuar flukset e refugjatëve nga Ukraina. “Rreziqet për Moldavinë për shkak të luftës në Ukrainë mbeten të larta. Qeverisë i duhen kompetenca të zgjeruara”, tha Gavrilitsa.
Rreth 500,000 refugjatë kanë kaluar kufirin që nga fundi i shkurtit, kur filloi pushtimi rus i Ukrainës. Nga këto, pak më shumë se 100,000 mbetën në Moldavi , një vend i vogël me një popullsi prej rreth 2.6 milionë banorë.
Parlamenti i Moldavisë fillimisht miratoi gjendjen e përkohshme të jashtëzakonshme menjëherë pas fillimit të luftës në Ukrainën fqinje dhe e zgjati masën në prill dhe qershor./FolDrejt/
