Një ish-mjek i Burgut të Peqinit është ekstraduar drejt Shqipërisë nga Italia.
Eduard Ruçi, 51-vjeç, i cili akuzohet se i ka marrë 2000 euro një të dënuari për vrasje, me qëllim që të përpilonte një raport mjekësor për ta dërguar të burgosurin në spital, për të kryer një operacion, është arrestuar në Itali, transmeton Fol Drejt.
Lajmin e bëri të ditur policia përmes një njoftimi, e cila bën me dije se mjeku ka pasur edhe dijeni që një i burgosur përdorte celular brenda ambienteve të burgut.
Njoftimi i Policisë:
Si rezultat i bashkëpunimit me Interpol Roma, është ekstraduar nga Italia drejt Shqipërisë, shtetasi Eduart Ruçi, 51 vjeç, banues në Durrës.
Ky shtetas ishte shpallur në kërkim ndërkombëtar pasi Gjykata e Posaçme e Shkallës së Parë për Korrupsionin dhe Krimin e Organizuar Tiranë, me vendimin penal të datës 06.02.2021, i ka caktuar masën e sigurisë “Arrest në burg”, për veprat penale “Korrupsioni pasiv i personave që ushtrojnë funksione publike” dhe “Moskallëzimi i krimit”.
Eduart Ruçi, në vitin 2019, gjatë kohës që ushtronte profesionin e mjekut, në spitalin e burgut të Peqinit, dyshohet se i ka kërkuar shumën 2000 euro, të afërmit të një dënuari me 35 vjet burgim, për vrasje, që të përpilonte një raport mjekësor, për dërgimin e të dënuarit në spital, për të kryer një operacion.
Gjithashtu, gjatë kohës së ushtrimit të kësaj detyre, shtetasi Eduart Ruçi, dyshohet se ka patur dijeni për një të dënuar që mbante aparat celular në ambientet e burgut, por nuk ka kallëzuar./FolDrejt/