Komisioni Zgjedhor rus njoftoi se më 10 shtator do të zhvillojë “zgjedhjet” lokale në territoret që Rusia pushtoi në Ukrainë dhe aneksimin e të cilave shpalli në shtator 2022, raportojnë mediat e huaja, përcjell Fol Drejt.
Sipas komisionit zgjedhor, qëllimi është të zgjidhen asambletë rajonale dhe këshillat bashkiakë, megjithëse Moska kontrollon vetëm pjesë të rajoneve Luhansk dhe Donetsk në lindje dhe Zaporozhye dhe Kherson në jug.
Luftimet vazhdojnë ende në ato zona dhe Ukraina aktualisht po kryen një kundërsulm që synon çlirimin e saj.
Pothuajse një vit e gjysmë që nga fillimi i sulmit në Ukrainë, Rusia kontrollon rreth 17 për qind të territorit ukrainas, duke përfshirë Krimenë, një gadishull që ajo aneksoi në 2014.
Presidenti rus Vladimir Putin njoftoi aneksimin e rajoneve Kherson, Zaporozhia, Lugansk dhe Donetsk në shtator të vitit të kaluar, pas organizimit të një pseudo-referendumi edhe pse aty pati përleshje dhe pavarësisht kritikave pothuajse unanime të komunitetit ndërkombëtar.
Putini i paraqet zonat si historikisht ruse dhe thotë se Kievi duhet të pranojë t’i dorëzojë ato për të arritur paqen. Ukraina përjashton çdo kompromis në lidhje me integritetin e saj territorial. /FolDrejt/
