Helikopterët e shpëtimit evakuuan të 18 anëtarët e ekuipazhit nga një anije që mbeti duke lëvizur pa drejtim në brigjet holandeze të Detit të Veriut sot pasi u përplas me një anije tjetër dhe filloi të mbushej me ujë gjatë një stuhie të fuqishme, njoftuan shërbimet e urgjencës.
Përplasja ndodhi pasi stuhia Corrie goditi pjesën e Evropës veriore. Stuhia erdhi pasi stuhia Malik mori të paktën katër jetë njerëzish gjatë fundjavës, duke shkatërruar disa shtëpi, duke shkaktuar përmbytje dhe duke lënë mijëra familje pa energji elektrike.
Një anije mallrash e quajtur Julietta D u përplas me një varkë tjetër rreth 32 kilometra në perëndim të portit të Ijmuiden, tha Edward Zwitser, zëdhënësi Kompanisë Mbretërore Holandeze të Shpëtimit. Mjeti tjetër lundjrues, Pechora Star, gjithashtu u dëmtua, por mundi të vazhdonte udhëtimin e saj.
Roja bregdetare holandeze tha se të gjithë anëtarët e ekuipazhit u shpëtuan, duke mos dhënë menjëherë detaje të tjera shpëtimit në det mes erërave të fuqishme, shkruan AA, transmeton Fol Drejt.
Tre helikopterë, përfshirë një nga Belgjika, u përfshinë në operacionin e shpëtimit.
Mijëra shtëpi në rajonin nordik mbetën pa energji sot dhe pati raportime për përmbytje në portet e Detit të Veriut dhe Detit Baltik në rajon. Holanda perëndimore u godit rëndë në mëngjesin e sotëm me stuhi të fuqishme që shkulën pemët dhe shkaktuan probleme trafiku.
Stuhia Corrie goditi gjithashtu Skocinë të dielën vonë, pas stuhisë Malik, e cila la mijëra njerëz pa energji elektrike në Skoci dhe Anglinë veriore, duke rrëzuar pemë, duke dëmtuar linjat e energjisë elektrike dhe çatitë e shtëpive.
Një djalë nëntëvjeçar në rajonin anglez Staffordshire dhe një grua 60-vjeçare në qytetin skocez Aberdeen vdiqën si pasojë e rrëzimit të pemëve të shtunën.
Gjithashtu gjatë fundjavës, media daneze raportoi se një grua 78-vjeçare vdiq nga lëndimet e rënda pasi u rrëzua nga erërat e forta. Në Gjermaninë fqinje, media lokale raportoi se një burrë humbi jetën të shtunën pasi u godit nga një billbord që u rrëzua nga stuhia.
