Çmimet e naftës e nisën javën me rënie, me të dhëna të dobëta ekonomike nga ShBA-ja dhe Kina që nxisin shqetësimet për kërkesën e ulët në konsumatorët më të mëdhenj të naftës në botë, raporton AA, përcjell Fol Drejt.
Standardi ndërkombëtar i papërpunuar Brent tregtohej me 74,03 dollarë për fuçi në orën 9:51 të mëngjesit me orën lokale (0651 GMT), një rënie prej 1,02% nga çmimi i mbylljes prej 74,79 dollarë për fuçi në seancën e mëparshme tregtare të premten.
Standardi amerikan West Texas Intermediate (WTI) tregtohej në të njëjtën kohë me 69,46 dollarë për fuçi, 1,01% më pak nga mbyllja e sesionit të kaluar prej 70,17 dollarë për fuçi.
Shqetësimet për një rënie të kërkesës globale për naftë dhe një ngadalësim të rritjes ekonomike ndikuan mbi çmimet.
Në ShBA, rritja ekonomike është ngadalësuar muajt e fundit për shkak të inflacionit të lartë dhe normave të interesit. Ekspertët tani presin të dhënat e inflacionit të konsumatorit në SHBA që priten të martën dhe vendimin e Fed për normat e interesit që pritet të mërkurën.
Të dhënat negative ekonomike nga Kina, importuesi më i madh në botë i naftës së papërpunuar, ngritën gjithashtu shqetësime për dobësimin e kërkesës.
Sipas Byrosë Kombëtare të Statistikave të Kinës, indeksi i çmimeve të prodhimit u ul me 4.6% në prill krahasuar me të njëjtën periudhë të vitit të kaluar, ndërsa indeksi i çmimeve të konsumit u rrit me 0.2%. Të dhënat treguan një rikuperim më të ngadaltë se sa pritej në ekonominë e Kinës që nga heqja e kufizimeve të COVID-19.
Për më tepër, mesazhi i Iranit se është i hapur për një marrëveshje me Perëndimin për programin e tij bërthamor mbështeti gjithashtu lëvizjet në rënie të çmimeve.
Udhëheqësi suprem i Iranit, Ayatollah Ali Khamenei, tha të dielën se një marrëveshje bërthamore me Perëndimin është e mirëpritur për sa kohë që infrastruktura e industrisë bërthamore të vendit mbetet e paprekur.
Komentet e Khameneit ngritën shqetësime se ekuilibri në tregun e naftës mund të prishet. Aktorët e tregut janë të shqetësuar për vërshimin e naftës iraniane në treg nëse hiqen sanksionet ndaj eksporteve të saj të naftës bruto. /FolDrejt/
