Ministrja e Arbërie Nagavci ka mbajtur sot një konferencë për media, raporton Fol Drejt.
Ministrja Nagavci e ka filluar konferencën duke shprehur indinjatën e saj në lidhje me rastin e dhunimit të 11 vjeçares nga Prishtina, nga pesë burra.
Ajo ka thënë se është e nevojshme që për këso rastesh, të gjitha palët e mundshme të koordinohen e të kontribuojnë në parandalimin e rasteve të tilla.
Tutje ajo tha se, Ministria e Arsimit, Shkencës, Teknologjisë dhe Inovacionit (MAShTI), i ka bërë përgatitjet e duhura për fillimin e vitit të ri shkollor.
“Nesër jemi me 1 shtator kur edhe zyrtarisht fillon viti i ri shkollor 2022 – 2023. Ministria e Arsimit, Shkencës dhe Inovacionit (MAShT), në koordinim me komunat, i ka bërë përgatitjet e duhura për fillimin e vitit të ri shkollor. Më lejoni të ju njoftoj se me këtë rast, në lidhje me përgatitjet për fillimin e vitit të ri shkollor, tashmë është bërë shpërndarja e teksteve mësimore dhe këtë vit shkollor, të gjithë nxënësit do të pajisen me tekste të reja.”
Tekstet janë shpërndara pa vonesë në të gjitha shkollat.
“Nga ky vit shkollor, të gjithë vogëlushët shqiptarë, do të mësojnë me të njëjtën abetare” – tha Nagavci, duke e paralajmëruar se kjo është bërë në bashkëpunim me Ministrinë e Arsimit të Qeverisë së Shqipërisë.
Për sa i përket grevës së paralajmëruar nga Bashkimi i Sindikatave të Pavarura të Kosovës (BSPK), ministrja tha se, edhe pse ajo është shpallur, ajo nuk është duke u mbajtur.
“E njëjta nuk është duke u mbajtur në shumicën e institucioneve. Me aq sa ne kemi të dhëna, janë diku mbi 90% të institucioneve të nivelit qendror, të agjencive e institucioneve në administratën publike, në shëndetësi e në sektorë të tjerë ku është duke u zhvilluar aktiviteti i punës njëjtë sikurse çdo ditë tjetër. Andaj unë pres dhe kërkoj që të mos ketë grevë as në sektorin e arsimit, e sidomos në sektorin e arsimit në çerdhe e në shkolla.”
Ajo ka thënë se si ministre, përgjatë mandatit të saj, ka qenë kooperuese me kërkesat që i kanë shkruar sindikalistët. Sipas saj, si ministri dhe qeveri, përherë kanë qenë të gatshëm për të ulur e për të biseduar. Sipas saj edhe ligji i pagave është në proces dhe se kërkesat e mësuesve janë marr parasysh./FolDrejt/
