Popullizmi është efikas vetëm në aspektin e joshjes së masave, por ai nuk t’i zgjidh problemet, sidomos ato ekonomike.
Shkruan: Imer Topanica
Që kemi kaluar nga një krizë e vjetër në një të re, nuk përbën ndonjë risi, por që Qeveria Kurti II, nuk i ka të gjitha përgjigjet për telashet me të cilat përballemi, tek tash kemi filluar ta kuptojmë. Janë rritur çmimet e miellit, bukës, mishit dhe produkteve të tjera, duke i përfshirë edhe ato mbi të cilat, njëfarësoj, besonim se e kishim njëfarë kontrolli. Për rrjedhojë, ekonomitë tona familjare ndodhen në një situatë dramatike.
Qytetari i ndodhur pa alternativë: duke iu shmangur ftesave për rebelim të partive të vjetra, të cilave ka vite që nuk iu beson dhe në anën tjetër përball një qeverie që s’jep shenja se e ka ndërmend të bëjë diçka konkrete, të mençur, qoftë edhe si zgjidhje afatshkurtre derisa të zbutet kriza, po ua mësynë dyerve të ambasadave, e që andej atyre të agjencive të udhëtimit, për t’ia thënë lamtumirën vendit. Pasiguria ka shtrirë rrënjët aq thellë sa që edhe të punësuarit nëpër institucione publike, nuk i kanë shpëtuar kancerit të pesimizmit.
Lëvizja Vetëvendosje! Ka ardhur në pushtet duke e trumbetuar idenë e një qeverisjeje të modelit krejt ndryshe, në raport me paraardhëset e saj. Por fakti që ajo mund të rreshtohet ndër ato më të pa-korruptuarat në historinë e re të Kosovës, nuk është i mjaftueshëm. Pra, si fakt, ai nuk ia del t’i përmbushë nevojat e qytetarëve. Kosova ka ngritur standardet demokratike, e për rrjedhojë janë shtuar edhe kërkesat e shoqërisë. Në një mënyrë a në një tjetër, jemi futur në një cikël i cili do t’i detyrojë entitetet politike që e kanë si objektiv pushtetin, të guxojnë t’i futen garës vetëm me pajisjet e duhura.
“Për qeverinë tonë, kthimi i jetës ekonomike në normalitet, është natyrshëm kryeprioriteti i angazhimit në ditët, muajt dhe vitin e parë të qeverisjes. Jo vetëm kthim në normalitet, por edhe përgatitje të të gjithë neve për një mënyrë të re të të bërit biznes. Dhe, për këtë jemi të gatshëm të ofrojmë një intervenim ambicioz fiskal” – thuhet ndër të tjera në Programin e Vetëvendosjes, i cili është publikuar në shkurt të vitit 2021. Fletushka që s’i kalonte 50 faqe, iu pat ofruar qytetarëve si ofertë, në një kohë kur këta të fundit nuk kishin opsione të tjera, veç ndëshkimit të partive që e patën sunduar vendin për dy dekada. Programi në fjalë me programin qeverisës të hartuar për vitet 2021 – 2025, për çudi, ndryshojnë pak. Imagjinoni, diferenca është 10 faqe më tepër, pa ndonjë dallim të madh në përmbajtje. Fraza të përgjithësuara, larg një plani të përimtuar deri në detaje, na ndih të kuptojmë më shumë se, për çfarë vizioni politik, ekonomik e kulturor bëhet fjalë.
Kryeministri, ministrat, deputetët etj, andaj, duhet ta harrojnë një herë e përgjithmonë frazën justifikuese “për këto njëzet vite”. Meqë askush nuk do t’ua rrezikojë pushtetin, veç nëse duan të rrëzohen vetë dhe në mënyrë që ta sigurojnë edhe një tjetër mandat, duhet t’i përvjelin mëngët e të punojnë.
Funksioni primar i qeverisë duhet të manifestohet në zhvillimin dhe forcimin ekonomik të vendit. Natyrisht që efektet e qeverisjes së mirë nuk mund të jenë të menjëhershme, por qytetarëve iu duhen dëshmi. Pse, fjala vjen, kryeministri duhet të shpenzojë energji për çështjen e qenve endacakë? Javë më parë, duke iu referuar këtij problemi, ai u zotua se niveli lokal ka nevojë ta ketë edhe mbështetjen e nivelit qendror “përmes hartimit të politikave dhe zbatimit të tyre, qoftë përmes mbështetjes financiare…”, ndërkohë që fqinjët tanë serbë, prioritet e kanë furnizimin me armatim.
