Sot (e shtunë) pak pas mesditës ka ndërruar jetë kryetari i Dibrës, Mr. Ruzhdi Lata, i cili prej disa javësh vuante nga një sëmundje e rëndë. Interesante, se një ditë përpara se të ndërronte jetë, komuna e Dibrës nxori në tender njërin ndër projektet më të mëdha të historisë të qytetit të Dibrës – Ujësjellësin për vaditjen e tokave – që në fazën e parë do kushtojë rreth 1 milion euro, kurse i gjithë projekti në tre faza mund të kap shifrën e 10 milion eurove.
Kush ishte Ruzhdi Lata, që me krenari e quante veten hoxhë
I lindur më 06.05.1953, në Dibër. Shkollën fillore e kreu në vendlindje, të mesmen në Medresenë “Alaudin” në Prishtinë. Pas përfundimit të shkollës së mesme vazhdon studimet ne fakulltetin Filologjik-dega Gjuhë orientale në Universitetin e Prishtinës. Shkallën e tretë të studimeve e kreu në Universitetin e Prishtinës dhe morri titullin Magjistër i shkencave të filologjisë.
Karriera: Prej vitit 1980 ka punuar në Bashkësinë Islame dhe në të njejtën kohë ka ligjëruar në Universitetin e Prishtinës në katedrën e Orientalistikës deri në vitin 1991 kur sërbët me dhunë e larguan nga fakullteti. Punën në Prishtinë e vazhdoi edhe dy vjet në shtëpi private ku fakullteti mbante mësim. Pas vitit 1993 përsëri paralelisht dy vjet punoi në Bashkësinë Islame në Maqedoni dhe në Fakultetin e Shkencave Islame në Shkup deri në vitin 1995. Pas vitit 1995 punoi vetëm në Bashkësinë Islame deri në vitin 2009, pas vitit 2009 gjer në vitin 2013 punoi në Bashkësin Islame dhe ligjerues në katedrën e Orientalistikës në Universitetin Shtetëror të Tetovës. Në vitin 2013 u votua dhe u zgjodh kryetar i Komunë së Dibrës.
Gjuhët: shqip, maqedonisht, sërbokroatisht, turqisht dhe arabisht.
Gjatë karrierës është marrë me përkthime nga arabishtja, vepra e dhjetë e Sahihil-Buhariut, nga turqishtja, romani i Sami Frashërit “Dashuria e Talatit me Fitneten”, publikim i disa artikujve në katër vazhdime për Haxhi Vehbi Dibrën, Haki Sharofin, Fuat Dibrën etj.
Pjesmarrës në disa simpoziume ndërkombëtare dhe konferenca shkencore me temë “Kontributi i Ulemave dibranë në lëvizjen kombëtare”, “Kontributi i Ulemave të Rekës”, “Pjesmarrja e hoxhallarëve në Lidhjen shqiptare të Prizrenit dhe në Shpalljen e Pavarësisë” etj.
Përkrahës i lëvizjeve demokratike në Dibër dhe më gjërë, kontribut të veçantë ka dhënë për themelimin e partive politike shqiptare në Dibër pas vitit 1990. Njihet edhe si aktivist për pajtimin e popullatës në raste konfliktesh të të gjitha niveleve dhe ka të regjistruar mbi 150 pajtime. Njihet edhe si organizator për ndihmesë materiale për nevojën e kosovarëve, për pritjen dhe sistemimin e bashkëatdhetarëve nga Kosova në Dibër, për Lëvizjen kombëtare shqiptare në Maqedoni, për nevojat e qytetarëve të Peshkopisë në krizën e vitit 1997 etj.
Për punën e bërë me rastin e 100 vjetorit të Pavarësisë dekorohet Qytetar Nderi nga Këshilli Bashkiak i Peshkopisë.
Kryetari Ruzhdi Lata, duke qenë hoxhë dhe duke jetuar në një mjedis ku komunizmi la mbresa të veçanta – nuk e kishte lehtë të merrej me ata që ishin besnikë “titist” dhe me “enveristët”. Por me kalimin e kohës ai arriti të ruajë konceptin fetar me ndërtimin e shumë xhamive, shkollimin e shumë hoxhallarëve, duke triumfuar me profesionin e tij që diti çdoherë të jetë krenar – hoxhë.
Ne si redaksi i shprehim ngushëllimeve familjes, të afërmve dhe të gjithë simpatizantëve të tij.
