Qeveria e Serbisë në seancën e fundit të jashtëzakonshme e shpalli 27 shtatorin ditë zie, pas ngjarjeve të fundit në Kosovë. Sulmi terrorist i një grupi serbësh të armatosur në veri të Kosovës, i prirë nga zëvendëskryetari i Listës Serbe Milan Radojçiq, ka nxitur opinionin serb t’i adresojë qindra pyetje në drejtim të presidentit Aleksandër Vuçiq, i cili shihet si fajtori kryesor për ngjarjen e së dieles, transmeton Fol Drejt.
“Kostoja e kësaj aventure të Vuçiqit me pasoja të paparashikueshme është aq e madhe, saqë çdo qytetar i Serbisë me të drejtë pyet se çfarë do t’i bëjë këtij vendi dhe popullit pronari i parullës parazgjedhore “Paqe, stabilitet, Vuçiq”, ka thënë për “Danas” deputeti serb Srdan Milivojeviq.
Sipas tij, çdo ditë që kur regjimi mafioz i Aleksandër Vuçiqit është në pushtet është ditë zie në Serbi.
“Nuk kalon ditë pa rënë një viktimë si ato të fundit nga vendimet katastrofike të Aleksandar Vuçiqit, të cilat kërcënojnë interesat jetike kombëtare të vendit tonë. Largimi i këtij njeriu të rrezikshëm për të ardhmen e Serbisë është një synim politik prioritar i secilit që e konsideron veten si njeri që e do Serbinë dhe që kujdeset për këtë vend” – thekson Milivojeviq.
Një pjesë tjetër e opinionit, grupin terrorist që i sulmoi autoritetet e rendit në Kosovë, duke e lënë të vdekur policin Afrim Bunjaku, i shohin si heronj të cilët janë ngritur kundër gjoja “terrorit” të ushtruar nga Qeveria e Kosovës.
Lideri i Dveri, Boshko Obradoviq beson se shpallja e Ditës së Zisë është minimumi i ngushëllimeve të kombit për dhimbjen e familjeve serbe nga Kosova që kanë humbur të dashurit e tyre.
“Është një moment vendimtar që ne si shtet, qytetarë dhe patriotë të solidarizohemi me serbët në Kosovë dhe Metohi, të cilët prej muajsh po vuajnë terrorin e Kurtit, i cili po bëhet me pëlqimin e NATO-s. Kush do t’i mbështesë nëse jo shteti i Serbisë dhe të gjithë ne serbët në mbarë botën” – pyet Obradoviq.
Profesori i drejtësisë, Bojan Pajtiq, vlerëson për Danas se vendimi i regjimit serb për tërheqjen e policëve serbë nga veriu i Kosovës, bëri që zona tash të jetë fuçi baruti.
“Është e drejtë të shpallet Ditë zie. Është e sigurt që duhet t’i vajtojmë të gjitha viktimat – serbe dhe shqiptare, por nëse qeveria qëndron në gjeste simbolike dhe nuk ofron ndonjë zgjidhje konkrete (si p.sh. kthimi i policëve serbë në strukturat e policisë së Kosovës në veri), tregon edhe një herë se sa të paaftë dhe të padenjë janë njerëzit që udhëheqin Serbinë” – thekson Pajtiq.
Vladan Slavkoviq nga Fronti Lokal i Kralevës për Danas deklaron se, si edhe më parë, partia në pushtet do të fshihet pas të vdekurve dhe do të përpiqet të kompensojë mungesën e reagimit, por edhe mungesën e ndikimit në territorin e Kosovës.
“Tani është më se e habitshme se si marrëveshja e Brukselit i çmontoi institucionet e Serbisë dhe se si njerëzit normalë në Kosovë janë të frikësuar derisa milicia mafioze dhe policia e Prishtinës po luftojnë rreth tyre. Druaj që tani frika ka depërtuar në krye të qeverisë serbe, sepse pasojat e kësaj llogarie i vijnë drejtpërdrejt presidentit Vuçiq. Si përmes vlerësimit, ashtu edhe përmes fiaskos diplomatike” – ka thënë Slavkoviq.
Lëvizja për Rimëkëmbjen e Mbretërisë së Serbisë (POKS) ka kërkuar nga autoritetet në Serbi që të shpallin tri ditë zie dhe të shpallin sa viktima serbe ka pasur në konfliktin që ndodhi në fshatin Banjska në veri të Kosovës dhe cilat janë arsyet për të.
Presidenti i POKS-së, Vojislav Mihailoviq, në një deklaratë ka vlerësuar se konfliktet në veri të Kosovës janë rezultat i “regjimit fashist” të kryeministrit të Kosovës Albin Kurti, “i mbështetur nga trupat e NATO-s dhe politika e gabuar e dorëzimit ndaj Perëndimit, i cili ka është ndjekur vazhdimisht nga zyrtarët serbë për vite me radhë”.
“Nëse marrëveshja e Brukselit e nënshkruar nga Ivica Daçiq në vitin 2012 nuk do të tërhiqte policinë serbe nga veriu i Kosovës, si dhe gjyqësorin dhe institucionet e tjera të vendit tonë, dhe nëse presidenti i Serbisë së fundi nuk do ta pranonte marrëveshjen franko-gjermane e cila de fakto e njeh shtetin e rremë ‘Republikën e Kosovës’, serbët nuk do të liheshin në duart e tyre në mbrojtje të jetës dhe pronës së tyre”, tha Mihailoviq.
Dita e zisë në Serbi është shpallur për herë të fundit në maj, pas vrasjes masive në shkollën fillore “Vladislav Ribnikar”. Më pas, në mesnatën e 5 majit filloi tri ditë zie, të cilën Qeveria e Republikës së Serbisë e shpalli për tragjedinë e Ribnikarit./FolDrejt/
