Përfaqësuesit e partive dhe lëvizjeve opozitare në Novi Sad, si dhe lëvizjes që mbledh rusët që jetojnë në Serbi, do t’i paraqesin Presidentes së Kuvendit të qytetit, Jelena Marinkoviq Radomiroviq, një kërkesë të përbashkët për revokimin e statusit qytetar nderi i Novi Sadit për Vladimir Putinin, shkruan Danas, përcjell Fol Drejt.
Kërkesa do të dorëzohet para fillimit të seancës së Kuvendit të Novi Sadit nga përfaqësues të Aksionit të Vojvodinës Progresive, lëvizjes Qytetarët e Lirë, Shoqërisë Demokratike Ruse dhe Aleancës për Liri të Serbisë së Lirë – Grupi Oktobar.
Putinit iu dha statusi qytetar nderi në vitin 2008, kur Novi Sadi drejtohej nga Maja Gojkoviq, por atëherë si anëtare e Partisë Radikale Serbe.
“Diktatori, uzurpatori dhe një nga armiqtë më të mëdhenj të Rusisë, të cilin ai e shkatërron, e turpëron dhe pothuajse e çon drejt zhdukjes së saj, nuk ka vend në mesin e qytetarëve të nderuar të Novi Sadit, apo të ndonjë qyteti tjetër. Ai i përket burgut. Dëmi që është bërë nga ai ndoshta nuk është bërë nga asnjë sundimtar tjetër në historinë e Rusisë”, tha Petar Nikitin, themeluesi i Shoqërisë Demokratike Ruse.
Ai shton se pret që qyteti i Novi Sadit të bëjë atë që është pritshme dhe thjesht ta fshijë emrin e atij “krimineli, hajduti dhe vrasësi” nga lista e qytetarëve të nderit, sepse është turp për këtë qytet. Është turp, thekson ai, për shkak të miliona ukrainasve që ishin viktima të luftës dhe rusëve që iu desh të largoheshin nga vendi i tyre.
Aleksandër Jovanoviq, themeluesi i Aksionit të Vojvodinës Progresive, thotë se në shpjegimin e vendimit për shpalljen e Putinit qytetar nderi në vitin 2008, thuhej se ai avokon për paqen dhe përmirësimin e reputacionit të Serbisë.
“Kishte një sulm dhe agresion, megjithatë kushdo dëshiron ta kualifikojë dhe gjërat u ndërlikuan edhe më shumë. Për të qenë i qartë, ai nuk e meritonte të ishte qytetar nderi i Novi Sadit as më parë. Ne besojmë se Novi Sadi nuk duhet të dëmtohet dhe ta prishë reputacionin e tij. Qyteti ynë bazohet në vlerat e paqes, tolerancës dhe lirisë dhe nuk duhet të krenohet me një njeri që promovon tiraninë, luftën dhe shkatërrimin”, tha Jovanoviq.
Siç shton ai, është në dijeni se Kuvendi i Qytetit nuk ka asnjë detyrim ndaj tyre, por ata do ta paraqesin kërkesën nesër dhe do të nisin këtë iniciativë. /FolDrejt/
