Arben Çejku, ish ambasador i Shqipërisë në Kosovë dhe Maqedoni të Veriut, ka thënë se nëse Kosova posedon një listë të agjentëve të Serbisë të infiltruar në protestat në veri, le ta bëjë publike, shkruan Fol Drejt.
Çejku këtë deklaratë e ka dhënë gjatë një intervistë për emisionin “Përballje”, me kryeredaktorin e Telegrafit, Muhamet Hajrullahu.
“Në të gjithë këto vite Shqipëria është aty për të ndjekur hapat dhe sukseset e Kosovës, si një shtet i ri por, nga ana tjetër edhe këtë brengosje dhe këto lloj zhvillimi që nuk është pozitiv për Kosovën, siç janë ngjarjet e fundit në veriun e saj dhe natyrisht Shqipëria e shikon këtë nga disa këndvështrime, pikë së pari e sheh si nga ndjenja kombëtare që bashkohet në këto problematika, e dyta si vend fqinj me të cilin ne ndajmë shumë bashkëpunime të përbashkëta, e treta nga këndvështrimi rajonal, perëndimor”, ka deklaruar ai.
Meqë Shqipëria, Kosova dhe Maqedonia e Veriut janë vende të përfshira në rrugën e integrimeve, veç që preokupohen për njëra tjetrën, ato mund edhe ta ndihin njëra tjetrën.
Diplomati shqiptar tha se nëse Qeveria e Kosovës ka një listë të personave të identifikuar të agjentëve të infiltruar nga Serbia në territorin e Kosovës duhet ta bëjë publike.
“Ka patur një thirrje të vazhdueshme të faktorit ndërkombëtarë drejtuar qeverisë Kurti për të bërë hap mbrapa dhe të ndihmuar në stabilizimin e kësaj situate duke marr vendimin adekuate për katër kryetarët e komunave të veriut. Por, ka ende mangësi dhe duhet një formë më e theksuar e faktorit ndërkombëtarë për t’i kërkuar Serbisë heqjen e menjëhershme dhe pa kushte të agjentëve të infiltruar në veriun e Kosovës siç është rasti i atij polici, i cili është nga Rudari. Kjo është një ndërhyrje e drejtpërdrejtë që duhet të marr dënimin e merituar pavarësisht ndonjë hapi të gabuar apo, të ndikuar të Qeverisë së Kosovës për të vendosur legjitimitetin në veri… Nga ana tjetër është e patolerueshme dhe e papranueshme banda kriminale e futur nga Serbia nën dirigjimin e shërbimeve sekrete të policisë së saj”, ka thënë ai./FolDrejt/
