Kryeministri i Izraelit, Benjamin Netanyahu, iu drejtua kombit me rastin e shpalljes së reformës në drejtësi dhe njoftoi se për shkak të demonstratave të mëdha dhe “paralizimit” të shtetit, vendimi po shtyhet për në verë, raporton Klix, përcjell Fol Drejt.
Në një fjalim dhjetëminutësh, Netanyahu theksoi se është i vetëdijshëm për tensionet në rritje në shoqërinë izraelite dhe tha se do të dëshironte që problemet të zgjidhen.
“Kam urdhëruar një pushim për miratimin e projektligjit për të dhënë një mundësi reale për dialog. E vetmja gjë që nuk jam i gatshëm të pranoj është se ekziston një grup i vogël ekstremistësh që janë gati të bëjnë copë-copë vendin tonë. Ata janë duke u përpjekur të na tërheqin në një luftë civile dhe po bëjnë thirrje për refuzimin për të shërbyer në ushtri që është një krim i tmerrshëm”, tha Netanyahu.
Ai tha gjithashtu se përmes dialogut po përpiqet të parandalojë një luftë civile në vend.
“Kur ka një opsion për të shmangur luftën civile përmes dialogut, unë do të zgjedh dialogun. Kjo është përgjegjësia jonë kombëtare. Shumica e partnerëve të koalicionit mbështesin vendimin për të shtyrë debatin për reformat në drejtësi”, tha Netanyahu.
Kujtojmë se kryeministri izraelit propozoi që të kufizohet e drejta e Gjykatës së Lartë për të vënë veton ndaj ligjeve të miratuara nga Kuvendi dhe t’i lihet qeverisë kontrolli i zgjedhjes së gjyqtarëve.
Përfaqësuesit e opozitës thanë se reforma i shërben interesave të vetë Netanyahut dhe kabinetit të tij dhe minon themelet demokratike të shtetit.
Reforma në drejtësi ka ndezur protesta masive në të gjithë vendin, të cilat kanë vazhduar që prej shpalljes së ndryshimeve të propozuara. /FolDrejt/
