Parlamenti izraelit ka miratuar një ligj që siguron mbrojtje shtesë ligjore për kryeministrin e vendit, Benjamin Netanyahu, dhe kjo lëvizje është kritikuar ashpër nga opozita, raporton Klix, përcjell Fol Drejt.
Gjegjësisht, me 61 vota pro, deputetët në Izrael miratuan një ligj që nuk do ta detyrojë kryeministrin të largohet nëse ndaj tij janë nisur procedura të caktuara ligjore.
“Ligji në mënyrë specifike bllokon gjykatën e lartë që të urdhërojë kryeministrin të marrë leje dhe shihet si një reagim ndaj frikës se Gjykata e Lartë e Drejtësisë mund të detyrojë Netanyahu të japë dorëheqjen për shkak të një konflikti të mundshëm interesi”, shkruan The Times of Israel.
Kryeministri i Izraelit është në gjyq në tre raste të veçanta dhe përballet me akuza për ryshfet, mashtrim dhe shkelje të besimit për marrjen e dhuratave të shtrenjta nga organizatat bamirëse dhe përpjekjen për të negociuar marrëveshje të fshehta me kompanitë mediatike për mbulim më pozitiv.
Sipas ligjit të përjashtimit të miratuar nga parlamentarët, vetëm tre të katërtat e votave në koalicionin qeverisës mund ta shtyjnë kryeministrin të marrë një pushim të përkohshëm dhe vetëm për shkak të problemeve shëndetësore mendore ose fizike.
Kreu i opozitës Yair Lapid dënoi miratimin e ligjit dhe i quajti anëtarët e koalicionit qeverisës hajdutë nate që miratuan ligjin që është mishërimi i korrupsionit.
“Qytetarët e Izraelit e dinë se ndërsa kostoja e jetesës po rritet, Netanyahu po kujdeset vetëm për veten e tij”, tha Lapid.
Lideri i laburistëve Merav Michaeli gjithashtu kritikoi ligjin dhe tha se miratimi i tij ishte një akt i turpshëm.
“Ky është një ligj i turpshëm, i gjithë qëllimi i të cilit është të na pengojë të dërgojmë Netanyahun në burg. Kjo është lufta jonë e dytë për pavarësi dhe ne duhet ta fitojmë atë,” tha Michaeli.
Krahas këtij ligji, Izraeli gjatë javëve të fundit po përballet me një sërë krizash të brendshme, që rrjedhin mbi të gjitha nga vendimet e qeverisë për reformimin e sistemit gjyqësor. Për ditë të tëra, izraelitët kanë organizuar protesta në të gjithë vendin, por Netanyahu dhe koalicioni qeverisës mbeten të vendosur për të kaluar të gjitha reformat që shumë i kanë përshkruar si një goditje për demokracinë. /FolDrejt/
