Tabloidi gjerman “Bild” e ka shtruar për diskutim situatën e tensionuar në Kosovë, me tre ekspertë, të cilët i ka pyetur nëse Evropa po kërcënohet nga një luftë e re? Nëse ka dorë Putini në të? Dhe, se çfarë duhet të bëjë BE-ja tani?, përcjell Fol Drejt.
Bild në hyrje të tekstit tregon se çfarë ndodhi të dielën, më 24 shtator, “kur dhjetëra serbë të armatosur rëndë në veri të Kosovës sulmuan policët e Kosovës. Një polic u vra dhe një tjetër u plagos rëndë. Në sulm u vranë tre sulmues serbë.”
Bild ka theksuar faktin se “presidenti serb Aleksandar Vuçiq (53), i cili ka lidhje të ngushta me Rusinë dhe Kinën, ka vendosur ushtrinë në kufirin me Kosovën”.
Bild foli me ekspertë për këtë dhe pyeti: “A kërcënon një luftë e re?” A ka dorë Putini në të? Çfarë duhet të bëjë BE-ja tani?”
Erhard Biller 67 vjeçar, gjeneral në pension dhe shef i KFOR-it, për Bild ka thënë se zhvillimet aktuale në kufi janë “shqetësuese”. “Është hera e tretë në dy vjet që Vuçiq ka dislokuar trupat e tij – por kurrë nuk ka qenë aq e rrezikshme dhe masive sa tani. Duhet të marrë fund kjo.”
“Rusia dhe Serbia, Putini dhe Vuçiq, mbështeten në konfliktet e ngrira etnike në Ballkan, të cilat mund t’i rindezin në çdo kohë. Putin është padyshim një pjesë aktive e këtij konflikti. BE dhe NATO duhet të vendosin sanksione ndaj Beogradit. NATO e trajton Ushtrinë Serbe si partnere dhe e fton në stërvitje. Politikisht, ne duhet të vazhdojmë të flasim, por partneritetit ushtarak tani duhet t’i vendoset një akull”, ka thënë tutje Biller për Bild.
Jakov Devçiq, shefi i zyrës në Beograd të Fondacionit Konrad Adenauer (CDU) në lidhje me dislokimin e ushtrisë serbe, tha për Bild se “ishte një demonstrim i forcës dhe masave parandaluese nga Kosova, e cila filloi të vendoste policinë e saj speciale në veri tash e disa muaj më parë”. Ai beson se lufta nuk ka gjasa: “Shumica e serbëve nuk duan ta njohin shtetin e Kosovës në asnjë formë, por as nuk janë të interesuar të luftojnë për të.”
Devçiq paralajmëron “një tjetër zonë të hapur krize në Evropë menjëherë para zgjedhjeve evropiane dhe zgjedhjeve presidenciale në SHBA – në vitin 2024.
“Vakumi i pushtetit që rrethon zgjedhjet në Perëndim do të kufizojë aftësinë tonë për të vepruar,” tha ai.
BE-ja dhe KFOR-i do të duhej të vepronin më fuqishëm, mendon ai.
“Pa një prani më të madhe të Perëndimit, pra edhe të Gjermanisë, në veri të Kosovës, nuk do të ketë paqe dhe siguri”, tha Devçiq për një tabloid gjerman.
Konrad Cleving i Institutit Leibniz për Kërkimet e Evropës Lindore dhe Juglindore thotë për Bild:
“Kësaj radhe situata është më e rrezikshme. Sepse trupat sigurisht që mund të përdoren për sulme në territorin e Kosovës. Sot, për herë të parë, mendoj se është e mundur një luftë e re, megjithëse ende nuk ka shumë gjasa që të ndodhë”.
Cleving thotë arsyet e mendimit të tij: “Në fjalimin e tij drejtuar kombit të dielën në mëngjes, Vuçiq tha se bëhet fjalë për “sovranitetin serb dhe ‘integritetin territorial’ (përfshirë Kosovën!)”, dhe se Serbia do të fitojë.”
“Fakti që forcat e KFOR-it të udhëhequra nga NATO janë stacionuar në Kosovë që nga viti 1999 dhe se atyre u lejohet të ndërhyjnë menjëherë ushtarakisht do të thotë se “kalimi i kufirit serb në Kosovë nga ushtria serbe çon në mënyrë të pashmangshme në një luftë midis Serbisë dhe NATO-s”, ka vijuar Cleving.
Cleving paralajmëron për “destabilizimin” e Evropës – dhe për “turpin e madh për BE”.
“I ashtuquajturi dialog i moderuar i BE-së ndërmjet Serbisë dhe Kosovës nuk ka çuar pothuajse në asgjë. Serbia duhet ndalur – së pari diplomatikisht dhe politikisht. Por nëse bëhet e nevojshme, përmes NATO-s – edhe ushtarakisht”, thotë Kleving për Bild./FolDrejt/
