Prokuroria Themelore e Pejës ka ngritur aktakuzë ndaj tre të dyshuarve për vrasjen e dy nxënësve dhe shoferit të autobusit para një viti gjysmë në Gllogjan.
Këtë e ka bërë të ditur të premten prokurorja e rastit, Sahide Gashi gjatë një konference për media, e cila tha aktakuzë për këtë rast është ngritur ndaj Kreshnik e Kastriot Mehmetaj për veprën penale vrasje e rëndë dhe ndaj Halil Mehmetaj për shtytje në kryerje të veprës penale, raporton “Betimi për Drejtësi”.
“Pas hetimeve prokuroria sot më 5 maj ka ngritur aktakuzë në Gjykatën Themeore në Pejë kundër Kastriot Mehmetaj e Kreshnik Mehmetaj për vepër penale si bashkëkryes të veprës së rëndë. Kemi ngritur aktakuzë edhe kundër Halil Mehmetaj për vepër penale shtytje në vepër të rëndë. Pa përfundimit të hetimeve dhe shqyrtimit të të gjitha provave, prokuroria për të pandehurin Malsor Mehmetaj nuk ka arritur të vërtetoj dyshimin se i njëjti të ketë qenë i përfshirë në ndonjë mënyrë në krim, andaj prokuroria ka marrë vendim që kundër tij t’i pushojë hetimet”, tha ajo.
Prokurorja Gashi ka bërë të ditur për veprimet që janë ndërmarrë në hetimin e rastit.
“Për shkak të kushteve të rënda atmosferikë atë ditë dhe ditëve në vijim, ekzaminimi i vendit të ngjarjes nga njësiti i forenzikës kanë kryer prehjen e zonës së krimit. Natën kritike është sjellë ekipi i qenve, por për shkak të kushteve atmosferike nuk ka qenë i mundur gjurmimi i kryesve. Pas grumbullimit të të gjitha informatave, provave, kemi mundur të konstatojmë me besueshmëri se nuk ka indikacione për sulm terrorist, kemi të bëjmë me ekzekutues me shumë gjasë i maskuar. Targeti i sulmit ishte shoferi i autobusit, se kemi të bëjmë me një sulm mirë të planifikuar, mbi bazën e treguese si përzgjedhja e vendit ku përveç një vendbanimi të vogël që gjendej në largësi të autobusit, nuk ka asnjë shtëpi; kohën, stinën e dimrit, kushtet atmosferike; kryesi paraprakisht e ka ditur mirë itinerarin e autobusit; veprimet e kryesit, shtirja si person i dehur apo me probleme, që ta detyrojë shoferin që ta ulë shpejtësinë”, ka thënë Gashi.
Tutje, ajo bëri të ditur se gjatë hetimeve janë proceduar 86 persona, qindra informata, janë analizuar mbi 40 video-incizime nga Gjakova e deri në Gllogjan, teksa shtoi se janë dërguar prova edhe në Zvicër e Shqipëri.
“Janë siguruar informata nga burime jashtë vendit, kompania Facebook dhe kompania Viber në Luksemburg. Si përfundim, nga të gjitha hetimet kemi arritur që të sigurojmë prova ku e kemi ndërtuar të gjithë ngjarjen e natës kritike”, tha Gashi.
Tre persona kishin mbetur të vdekur dhe një ishte plagosur, nga sulmi me armë zjarri që kishte ndodhur mbi autobusin me udhëtar në fshatin Gllogjan të Deçanit më 26 nëntor të vitit 2021.
Dy nga të vdekurit ishin nxënës ndërsa personi tretë ishte drejtuesi i autobusit.
Dy javë pas rastit ishin arrestuar fillimisht tre të dyshuari për këtë vrasje të trefishtë, ndërsa më 5 shkurt të këtij viti ishte prangosur edhe i dyshuari i katërt.
Ndryshe, Gjykata Themelore në Pejë më 12 dhjetor 2021, kishte caktuar masën e paraburgimit ndaj tre të dyshuarve.
Në këtë vendim, thuhej se gjykata vlerësoi se ekziston dyshimi se të njëjtit i kanë kryer veprat penale për të cilat dyshohen, atë të vrasjes së rëndë dhe të armëmbajtjes pa leje.
Sipas arsyetimit të gjykatës, ekziston rreziku që të dyshuarit të arratisen, të ndikojnë te dëshmitarët apo te të dëmtuarit, të fshehin provat ose të bashkërendojnë mbrojtjen për të pamundësuar zbardhjen e rastit. /BetimipërDrejtësi/.
Shënim: Personat e përmendur në këtë artikull konsiderohen të pafajshëm, përveç nëse nga gjykata vërtetohet se janë fajtorë me vendim të formës së prerë.
