Një nëndetëse amerikane me energji bërthamore ka mbërritur në një port në qytetin Busan të Koresë së Jugut, tha ushtria e Koresë së Jugut, raporton Klix, përcjell Fol Drejt.
Ky veprim vjen pasi Koreja e Veriut lëshoi dy raketa me rreze të shkurtër veprimi nga bregu i saj lindor të enjten dhe përpjekjes së dështuar të Phenianit për të lëshuar një satelit spiun muajin e kaluar, raporton Reuters.
Në prill, presidenti i Koresë së Jugut, Yoon Suk Yeol dhe Presidenti i ShBA Joe Biden ranë dakord në Uashington për të përmirësuar më tej “dukshmërinë e rregullt të aseteve strategjike” në Gadishullin Korean.
Udhëheqësit ranë dakord gjithashtu që një nëndetëse raketore balistike e armatosur me armë bërthamore të marinës amerikane (SSBN) do të vizitonte Korenë e Jugut për herë të parë që nga vitet 1980 për të ndihmuar në demonstrimin e vendosmërisë së Uashingtonit për të mbrojtur vendin nga sulmi i Koresë së Veriut.
Për kujtesë, ky vendim është akti kryesor i “Deklaratës së Uashingtonit”, një masë e kushtueshme që synon ta bëjë Phenianin të mendojë dy herë për të nisur një sulm bërthamor ndaj fqinjit të tij jugor.
“Marrëveshja jonë e ndërsjellë e mbrojtjes është e fortë dhe përfshin angazhimin tonë për zgjerimin e parandalimit — dhe kjo përfshin kërcënimin bërthamor, parandalimin bërthamor,” tha presidenti i ShBA Joe Biden së fundmi në një konferencë shtypi në Shtëpinë e Bardhë me presidentin e Koresë së Jugut, Yoon Suk Yeol. /FolDrejt/
