Një peshkaqen i madh me peshë gati 800 kilogramë u kap në brigjet e Tajvanit, i cili kishte brenda gjashtë këlyshë të mëdhenj. Peshkaqeni i kapur besohet të jetë më i madhi i llojit të tij i kapur në këto ujëra, raporton Klix, përcjell Fol Drejt.
Peshkaqenët Goblin janë krijesa të çuditshme me një feçkë të gjatë të dalë dhe një rresht dhëmbësh të mprehtë. Këto kafshë të detit të thellë zakonisht gjenden thellë nën sipërfaqe. Sipas Muzeut Australian, peshkaqenët kalojnë shumicën e ditëve të tyre pranë shtratit të detit në thellësi prej rreth 300 deri në 900 metra. Zakonisht rriten nga tre deri në katër metra.
Kjo specie ka lëkurë transparente, trup rozë dhe dhëmbë vicioz. Për shkak se koka ka formën e një goblini, quhet ‘peshkaqeni goblin’. I njohur edhe si ‘peshkaqeni djall’, i përket familjes së peshkaqenëve të lashtë
Peshkaqeni Goblin është një specie e rrallë e peshkaqenëve në det të thellë. Nganjëherë quhet “fosil i gjallë”, është gjithashtu i vetmi anëtar i mbijetuar i familjes Mitsukurinidae, e cila është rreth 125 milionë vjet e vjetër. Këta peshkaqenë me të vërtetë shihen rrallë, me vetëm disa takime të regjistruara me njerëzit. Shkencëtarët morën disa prej tyre nga oqeani dhe u përpoqën t’i rritnin në akuariume të mëdhenj, por asnjëri nuk zgjati më shumë se një javë.
Paqësori veriperëndimor, duke përfshirë ujërat jashtë Japonisë dhe Tajvanit, thuhet të jetë një terren mbarështues për këtë specie. Disa studiues besojnë se këta peshkaqenë mund të notojnë edhe në një thellësi prej 1300 metrash. /FolDrejt/
