Qeveria e Norvegjisë ndan afërsisht 150 milionë NOK (15.1 milion dollarë) për Misionin e Ndihmës Ushtarake të Bashkimit Evropian në mbështetje të Ukrainës (EUMAM Ukraine), transmeton Ukrinform, përcjell Fol Drejt.
“Ukraina varet nga mbështetja e vendeve të tjera, jo më pak për të marrë armë dhe materiale të mjaftueshme për t’i bërë ballë luftës ruse. Norvegjia ka ofruar mbështetje të konsiderueshme dhe do të vazhdojë të kontribuojë me donacione të materialit ushtarak. Është e rëndësishme për sigurinë norvegjeze dhe evropiane që Rusia të mos e fitojë luftën e saj kundër Ukrainës. Forcat ukrainase po luftojnë një betejë të rëndësishme për demokraci dhe drejtësi”, tha ministri i Mbrojtjes Bjørn Arild Gram.
Norvegjia synon të kontribuojë duke mbështetur buxhetin operativ të misionit të trajnimit me rreth 150 milionë NOK përmes Fondit Evropian të Paqes (EPF).
Për më tepër, Norvegjia po financon pjesë të një donacioni estonez të një spitali fushor në Ukrainë, si dhe po dhuron pesë ambulanca ushtarake.
Siç raportoi Ukrinform, më 14 tetor, Këshilli i Bashkimit Evropian njoftoi zyrtarisht për nisjen e Misionit të Ndihmës Ushtarake të Bashkimit Evropian (EUMAM Ukraine) për të vazhduar mbështetjen e Ukrainës kundër luftës së vazhdueshme ruse.
EUMAM Ukraine ka një mandat joekzekutiv për të ofruar trajnime individuale, kolektive dhe të specializuara për deri në 15,000 pjesëtarë të personelit të Forcave të Armatosura të Ukrainës në shumë lokacione të territorit të shteteve anëtare të BE-së. /FolDrejt/
