Fatmir Gjeka, kryetar i Partisë Demokratike në Mal të Zi, ka thënë se nuk do të jetë aspak befasi nëse Mali i Zi do të udhëhiqej nga një kryeministër shqiptar, pas zgjedhjeve të cilat priten të mbahen së shpejti, shkruan Fol Drejt.
Për emisionin “Sytë 7” ai bëri me dije se shqiptarët në Mal të Zi më së shumti u bënë bashkë në koalicionin “Aleanca Shqiptare”, e cila përbëhet nga Partia Demokratike, Forca e Re Demokratike, Lidhja Demokratike në Mal të Zi dhe Grupi qytetar “Lëvizja për Tuz”; por ndërkohë, sipas tij, në garë është edhe Forumi Shqiptar i prirë nga Nik Gjeloshaj, dhe Unioni Demokratik, të cilët kanë bërë koalicion me subjektin politik të Milo Gjukanoviqit.
Gjeka, që aktualisht është edhe ministër i Pakicave në Qeverinë e shqiptarit Dritan Abazoviq, tha se ky i fundit do garojë si pjesë e një nisme qytetare, e përbërë nga të gjitha komunitetet në Mal të Zi.
Periudha e udhëheqjes nga Dritan Abazoviq, ishte e frytshme për sa i përket integrimit të shqiptarëve, të cilët arritën të marrin pozita të larta në hierarkinë udhëheqëse të shtetit.
Edhe pas zgjedhjeve të 11 qershorit, sipas Gjekës, do vazhdojnë me punë të mira për shqiptarët, dhe përfshirje sa më të madhe të diasporës shqiptare. “Kurrë si dihet” për sa i përket mundësisë së udhëheqjes së Malit të Zi përsëri nga një shqiptar./FolDrejt/
