I pari i Kuvendit të Kosovës skeptik për sa i përket arritjes së një marrëveshjeje të shpejt ndërmjet Kosovës dhe Serbisë, për sa i përket Asociacionit. Kështu të paktën është deklaruar sot pas mbledhjes së Kryesisë së Kuvendit, transmeton Fol Drejt.
Asociacioni i Komunave me Shumicë Serbe është nyja e pazgjidhur ndërmjet Kosovës dhe Serbisë. Pasditen e djeshme palëve në Beograd iu “servua” një draft statut i përpiluar nga Ekipi Menaxhues, anëtarët e së cilit u shkarkuan sot me një vendim të Elbert Krasniqit, ministër në Ministrinë e Administrimit të Pushtetit Lokal.
Tashmë ish autorët e draft-statutit të Asociacionit, Danjela Vujiçiq, Jelena Bojoviq, Igor Kalamar dhe Dejan Radojkoviq tani më nuk janë pjesë e të ashtuquajturit Ekip Menaxhues. Drafti që ata e prezantuan në Bruksel, u cilësua si i papranueshëm nga pala Kosovare.
Dje pas takimit, Kryeministri i Republikës së Kosovës Albin Kurti tha se “pas marrëveshjes për të pagjeturit, ne e dëgjuam me durim dhe vëmendje ekipin menaxhues që prezantoi një draft-statut me gjithsej 67 nene dhe mëpastaj dhamë qëndrimin tonë se një draft-statut i tillë, çfarë dëgjuam e lexuam, është fundamentalisht i papajtueshëm me Kushtetutën, ligjshmërinë, demokracinë, vlerat evropiane, të drejtat e njeriut, të pakicave sipas standardeve evropiane dhe përkundër kësaj do jemi të interesuar të gjejmë zgjidhje andaj me këtë rast propozova një draft-vizion si kryeministër i Kosovës përkitazi me nenin 7 të marrëveshjes bazike duke pasur në konsideratë edhe nenin 10”- ka deklaruar Kurti.
Pikërisht këto qëndrime krejt të kundërta, e kanë bërë skeptik edhe Kryetarin e Kuvendit Glauk Konjufca. Ky i fundit sot u shpreh se pa i braktisur Serbia parimet e nacionalizmit fashist serb, nuk ka përparim në këtë drejtim.
“Jam i bindur që në përputhje me Kushtetutën tonë këtu nuk është diçka që është e pranueshme për Serbinë, prandaj konsideroj që pozicionet janë shumë të largëta, pozicionet janë të papajtueshme mes palëve, andaj nuk pres fare që të ketë një marrëveshje të shpejtë mes Kosovës dhe Serbisë. Kjo nuk mund të ndodhë pikërisht për shkak të drejtimit politik që e ka Serbia sot”.
Zëra opozitarë kanë kërkuar sot nga BE që ta publikojnë draft-statutin e propozuar nga Ekipi Menaxhues i Kosovës. I pari i Aleancës për Ardhmërinë e Kosovës (AAK) Ramush Haradinaj sot tha se rezultatet e punës së këtij ekipi, kanë qenë të pritshme:
“Kosova e ka të pamundshme me pranua një draft-statut që bie ndesh me Kushtetutën dhe ligjet e Kosovës edhe po të ishte edhe vullnet i kujtdo qoftë është e pamundshme.”
Ai më tutje e ka komentuar shkarkimin e ekipit, duke e cilësuar si të pa vlefshëm “pasi ata kanë dhënë produktin, ata e kanë krye pjesën e vet të punës.”
Draft statuti sipas Haradinajt nuk mund të bie ndesh me rendin kushtetues të Kosovës dhe për këtë janë në dijeni edhe evropianët edhe amerikanët si palë ndërmjetësuese.
“Rrjedha e logjikshme është kjo. Unë jo se kam informacione, por rrjedha e logjikshme është kjo. Besoj se edhe e kanë të shkruar amerikanët dhe evropianët një draft-statut që është në përputhje me Kushtetutën, por është dashur të konsumohet propozimi i parë i komisionit, i cili është jo kushtetues”, ka deklaruar ai.
Edhe nënkryetari i Lidhjes Demokratike të Kosovës (LDK), Lutfi Haziri, e ka cilësuar si të vonshëm veprimin e shkarkimit të Ekipit Menaxhues.
“Veprimi është i vonshëm, kjo ka mundur të ndodhte para një viti që të shkarkohet ekipi menagjues sepse Kurti më shumë e një vit nuk ka marrë pjesë në dialog duke mos e trajtuar si prioritet. Elefanti në dhomë është statuti i Asociacionit dhe është dashur të pres që kjo do të ndodh herët a vonë”, ka thënë Haziri.
Nga Beogradi zyrtar, në anën tjetër, është mbajtur një qëndrim akuzues kundrejt palës kosovare, duke ia hedhur fajin kësaj të fundit si destruktive dhe e painteresuar për të gjetur zgjidhje.
Drejtori i të ashtuquajturës Zyra për Kosovën në Qeverinë e Serbisë, Petar Petkoviq, u deklarua së fundi se nuk pritet të ketë marrëveshje për faktin se pala kosovare është disponuar vetëm që të “mohojnë gjithçka që është rënë dakord” paraprakisht.
Së fundi emisari special i Shteteve të Bashkuara të Amerikës (ShBA), Gabriel Escobar, ka thënë se propozimet për draft-statutin e Asociacionit, si nga ana e Ekipit Menaxhues, ashtu edhe nga ana e Kryeministrit Kurti, ishin serioze. Por se nuk i takon atij të vendosë se “cili ishte më serioz”. Më tej Escobar ka thënë se është koha që palët të shënojnë progres në zbatimin e marrëveshjes, duke paralajmëruar takim të shpjet në nivel negociatorësh, ndërmjet palëve./FolDrejt/
