Historiani austriak Oliver Jens Schmitt në një intervistë për të përditshmen austriake Der Standard ka reflektuar mbi raportet e vendeve të Ballkanit Perëndimor, duke e vënë theksin te roli negativ i Serbisë, shkruan Fol Drejt.
Sipas tij, ndikimi i Kremlinit në Beograd duket i qartë, prandaj Bashkimi Evropian (BE), duhet të synojë fortifikim të lidhjeve me Serbinë, duke e forcuar bashkëpunimin, por duke e pasur parasysh karakterin negativ të Beogradit zyrtar.
I pyetur se çfarë lidhjesh sheh ai midis luftës së Ukrainës kundër agresionit rus dhe përshkallëzimit në veri të Kosovës, ai ka thënë se, pala serbe është duke e luajtur një rol negativ në këto zhvillime:
“Mund të shihni qartë se pala serbe po e kthen spiralen e përshkallëzimit. Mbase është e vështirë të shquhet kjo për shkak të vëmendjes që ka lufta në Ukrainë. Edhe zëdhënësja e Ministrisë së Jashtme ruse ka siguruar Serbinë për mbështetje të plotë. Lidhja mes dy krizave u bë kështu nga vetë Rusia. Në këtë kontekst tani po vepron qeveria serbe, e cila po krijon një sfond kërcënues. Gjithashtu mund të kuptohet qartë se presidenti serb Aleksandar Vuçiq nuk ka ndryshuar kurrë, ai është ende njeriu që dikur ishte Ministër i Propagandës në qeverinë e Sllobodan Millosheviqit. Ai përdor edhe gjuhën e kohës, duke e quajtur “llum terrorist” kryeministrin kosovar Albin Kurti, i cili dikur ishte në burgun serb si lider studentor” – ka thënë Schmitt.
I pyetur nëse Vuçiq me manovrat e tij po e dëshiron edhe një herë ndarjen e Kosovës, ai është përgjigjur:
“Ai ka zgjeruar hapësirën e tij të manovrimit. Por pjesët kryesore të elitave serbe nuk janë të gatshme të heqin dorë nga Kosova në tërësi, edhe nëse nuk arrijnë të shpjegojnë se si vendi mund të qeveriset kundër vullnetit të shumicës dërrmuese të popullsisë. Nuk është e sigurt që Vuçiq e sheh mbajtjen e veriut si zgjidhjen më të mirë…”
Për Schmitt nuk është thënë kurrë shkurt dhe qartë se Serbia, po aq sa është faktor stabilizues, për aq është edhe destabilizues. Kjo, sipas tij, vërehet edhe në kontekstin e dialogut të ndërmjetësuar nga BE:
“BE-ja e trajtoi Serbinë me konsideratën më të madhe dhe gjithmonë theksoi se Serbia ishte një faktor i rëndësishëm. Kjo është gjithashtu e vërtetë. Por Serbia është në radhë të parë një faktor negativ dhe shkatërrues. Qeveria serbe është shkaku kryesor i problemit dhe kjo duhet thënë qartë.”
Schmitt ka thënë po ashtu se është mirë që BE është shumë më aktive për sa i përket çështjes Kosovë – Serbi, duke mos shfaqur shumë entuziazëm në arritjen e shpejt të marrëveshjes finale./FolDrejt/
