Ministri i Financave, Hekuran Murati, ka thënë se ka pritur nga opozita që të paraqesë me numra se sa do të përfitojnë qytetarët e Kosovës nga propozimet e tyre se si të lehtësohet gjendja ekonomike.
“Tek çështja e heqjes së akcizës edhe TVSH-së dhe propozimet e juaja unë për besë kam pritur që sot meqenëse debati ka qenë i kërkuar nga ju dhe e keni ditur që do të vijë ky debat dhe keni qenë organizatorë kam pritur që së paku në alternativën që propozoni të vini edhe me disa shifra. Të dihet se sa i kushton kjo buxhetit në njërën anë dhe sa përfiton qytetari në anën tjetër, dhe pastaj ta krahasojmë me atë që kemi bërë ne. Ne kemi marrë vendime për 365 milionë euro dhe i listojmë të gjitha përfitimet që kanë pasë qytetarët duke filluar nga parandalimi i rritjes së çmimit të energjisë elektrike për 80% të familjeve, mbështetja me nga 100 euro për pothuajse të gjitha familjet, dyfishimi i asistencës sociale, mbështetja e lehonave dhe të tjera. Mund t’i listojmë se sa ka fituar secila familje dhe sa i ka kushtuar buxhetit”.
Ai, në seancën e sotme të Kuvendit, tha se meqë opozita s’e bëri këtë kalkulim e ka bërë ai, njofton Klankosova.tv.
Ministri Murati tha se sipas kalkulimit të tij del se nga këto politika të propozuara nga opozita një familje me të ardhura mesatare në Kosovë përfiton 16 euro e gjysmë në muaj, derisa thotë se me 100 eurot e ndara nga Qeveria për disa kategori një familje me të ardhura mesatare ka përfituar 200 euro në muaj.
“Nëse paga mesatare në familje është 400-450 euro, sa prej atyre parave shkojnë për t’i blerë këto produkte për të cilat keni propozuar që të zvogëlohet TVSH-ja? Le të themi rreth 100 euro se një pjesë shkon në produkte që janë me TVSH të zbritur, një pjesë me TVSH që nuk zbritet dhe një pjesë shkon në ekonominë joformale e cila nuk paguan fare TVSH. Le të themi 100 euro shkojnë për këto produkte që po doni ta ulni TVSH-në. Përfitimi mujor, nëse ulet TVSH-ja prej 18% në 8%, për një familje që ka të ardhura mesatare në Kosovë nëse proporcioni do të ishte 100 euro që blen produtke nga ajo shportë do të ishte 10 euro në muaj. 10 euro në muaj do të ishte përfitimi për një familje nga politika që po propozoni”.
“Propozimi tjetër është për ulje të akcizës në naftë, nga kalkulimi që kam parë nga deputeti Hoti është propozimi që akciza të ulet për 13 centë për litër të naftës. Ta llogarisim një familjare mesatare le të themi që shpenzon 50 litra karburantë në muaj dhe me 50 litra karburantë në muaj përfitimi i qytetarëve në muaj do të ishte 6 euro e gjysmë. 10 euro nga zbritja e TVSH-së për produktet bazë dhe 6 euro e gjysmë nga zbritja e taksave të tjera për naftën, pra do të përfitonim 16 euro e gjysmë zbritje për një familje në muaj. Propozimi është që kjo politikë të zgjasë 3 muaj dhe nëse e shumëzojmë 16 euro e gjysmë me 3 përfitojmë 49 euro e gjysmë – as 50 euro. Ne i kemi dhënë 100 euro për studentë, pensionerë dhe të punësuar dhe mesatarisht një familje ka përfituar 200 euro. Edhe po të zgjatej politika juaj për 6 muaj ose 12 muaj prapë do të ishte më pak sesa që ne kemi dhënë”.
