Besnik Tahiri, Shef i Grupit Parlamentar i AAK-së, e ka hapur diskutimin për punën dyvjeçare të qeverisë, duke e paraqitur rezolutën për këtë periudhë, shkruan Fol Drejt.
Sipas Tahiri, ndonëse jemi futur në vitin e tretë Qeveria Kurti “mund të lavdërohet për gjithçka, vetëm jo për punë dhe rezultate”.
Kjo qeveri, sipas tij, nuk ka vepruar për t’ua lehtësuar jetën qytetarëve. Ata kanë punuar “me kokën e tyre” në arbitraritetin e tyre.
Tahiri e ka përmendur rritjen e çmimit të energjisë elektrike, e cila ka ndodhur dy here brenda kësaj periudhe.
“Paga minimale është ende 170 euro, për dy vite rresht kjo qeveri nuk ka mundur ta sjell një ligj që e ngrit pagën minimale. Kryeministri ka pasur kohë të flas për Ohrin e Brukselin, për Lajçakun e Borrellin, për filtera e bojlera, por nuk ka pasur kohë që ta bjer ligjin” – i cili do të krijonte mundësi më të mëdha në sferën e punësimit privat.
“Sot Qeveria e Kosovës udhëhiqet me ushtrues detyre në nivele më të larta të shtetit. Sot agjencionet ekzekutive udhëhiqen me ushtrues detyre” – ka vijuar Tahiri, duke këmbëngulur se kriza vetëm sa është thelluar në kohën e Qeverisë Kurti./FolDrejt/
