Takimi që zgjati dy orë ndërmjet Kryeministrit të Republikës së Kosovës Albin Kurti dhe emisarëve perëndimorë për dialogun, dëshmoi se Perëndimi insiston që të normalizohen marrëdhëniet Kosovë – Serbi, shkruan Fol Drejt.
“Ne jemi këtu me një delegacion të fuqishëm të Bashkimit Evropian dhe Shteteve të Bashkuara të Amerikës, si dhe këshilltarëve të lartë të Gjermanisë, Francës e Italisë, duke dhenë sinjal të fuqishëm se ne jemi të zotuar për një normalizim të raporteve Kosovë-Serbi” – tha Miroslav Lajçak, i dërguar special i BE-së për këtë çështje.
Lajçak pranoi se takimi nuk ishte i lehtë për faktin se zgjati dy orë, duke paralajmëruar se i njëjti delegacion do të udhëtojë për në Beograd, për ta shtruar për diskutim të njëjtën çështje.
Megjithatë, në deklaratën e tij ai shprehu një dozë zhgënjimi, duke thënë se, megjithatë “kemi pritur kuptim më të mirë të mundësisë që ofron ky propozim… shpresoj të arrijmë aty dhe të shfrytëzohet potenciali i plotë i këtij propozimi…ne do të vazhdojmë të punojmë në këtë”, duke aluduar në planin të cilin delegacioni ia ka shpalosur palës kosovare.
Veç Lajçakut, pjesë e delegacionit ishin edhe këshilltarët për polikë të jashtme dhe siguri të Kancelarit të Gjermanisë, Olaf Scholz dhe Presidentit të Francës, Emmanuel Macron, z. Jens Plötner dhe z. Emmanuel Bonne, këshilltarin diplomatik të Kryeministrit të Italisë, Francesco Maria Talò dhe Zëvendës Ndihmës Sekretarin e Shteteve të Bashkuara për Çështje Evropiane dhe Euroaziatike dhe njëherësh të dërguarin e posaçëm të Shteteve të Bashkuara të Amerikës për Ballkanin Perëndimor, Gabriel Escobar.
I njëjti delegacion sot ka mbërritur në Beograd, ku janë takuar me Presidentin e Serbisë Aleksandër Vuçiq. Nga të dyja takimet, nuk është bërë transparente çka në të vërtetë ka propozuar ky delegacion përpara krerëve të të dyja shteteve.
Sipas njohësve të zhvillimeve politike, e vetmja gjë që dihet në këtë fazë është fakti që procesi i dialogut do të intensifikohet, ndërsa Perëndimi është i interesuar ta mbyll këtë kapitull me Ballkanin Perëndimor, duke shpresuar se do ta zbehë në masë të madhe ndikimin e Rusisë në Serbi./FolDrejt/
