Një delegacion i shoqërisë civile nga Kosova dhe Serbia pati mundësinë të takojë në Bruksel bashkëbisedues kyç nga institucione të ndryshme të BE-së, shkruan Iniciativa Peaceful Change, përcjell Fol Drejt.
Anëtarët e Mekanizmit të Reagimit të Shpejtë Kosovë-Serbi paraqitën ide rreth rolit që shoqëria civile mund të luajë duke pasur parasysh tensionet aktuale në terren dhe shpresat për një marrëveshje gjithëpërfshirëse ndërmjet Beogradit dhe Prishtinës.
Delegacioni u takua me raportuesit përkatës për Kosovën dhe Serbinë, Viola von Cramon-Taubadel dhe Vladimír Bilčík, plus ekipin e Përfaqësuesit Special të BE-së për Dialogun Beograd-Prishtinë, Miroslav Lajčák. Ata u takuan gjithashtu me zyrtarë nga Drejtoria e Përgjithshme për Fqinjësinë dhe Negociatat e Zgjerimit (DG NEAR) dhe Shërbimin Evropian të Veprimit të Jashtëm (EEAS).
Vlen të përmendet se disa bashkëbisedues folën për një ndjenjë të vrullit që me sa duket ekziston brenda vendeve anëtare në lidhje me procesin e zgjerimit të BE-së. Kjo vjen si diçka befasuese duke pasur parasysh ndjenjën e thellë në Ballkanin Perëndimor se pranimi ka ngecur. Sondazhet e rregullta të perceptimit tregojnë ambivalencë në rritje ndaj rrugës së BE-së, veçanërisht në Serbi, duke përforcuar nevojën për një qasje më strategjike ndaj komunikimit për të ripohuar jo vetëm perspektivën evropiane, por për të përsëritur se BE-ja mbetet donatori dhe partneri tregtar më i madh i rajonit.
Pjesëmarrësit – ndonëse pranuan nevojën për konfidencialitet gjatë negociatave – ngritën shqetësime për mungesën e transparencës në lidhje me strukturën dhe përmbajtjen e dialogut Beograd-Prishtinë. Ata propozuan të angazhohen me qeveritë e tyre përkatëse për të kërkuar që më shumë informacion të vendoset në domenin publik. Për më tepër, u ngritën shqetësime për zbehjen e raportimit për kapitullin 35, që mbulon normalizimin e marrëdhënieve ndërmjet Serbisë dhe Kosovës, veçanërisht standardet e ndërmjetme.
Të pranishmit ritheksuan gjithashtu se shoqëria civile duhet parë si burim dhe aleat si në dialog ashtu edhe në proceset më të gjera reformuese. Me marrëdhëniet në komunitete specifike, shoqëria civile ofron aftësi të paralajmërimit të hershëm që mund të ndihmojnë në identifikimin e ankesave specifike dhe të ndihmojnë në zvogëlimin e hapësirës për keqkuptime duke transmetuar perspektiva rreth një çështjeje nga aktorët lokalë.
Organizatat e shoqërisë civile riafirmuan përkushtimin e tyre për të plotësuar dhe përforcuar mesazhet që bazohen në nevojën për kompromis, duke u përballur me qeveritë e tyre aty ku është e nevojshme për të sfiduar narrativat specifike rreth disa aspekteve të dialogut Beograd-Prishtinë. Kjo u konsiderua gjithnjë e më e domosdoshme për shkak të tensioneve të fundit në veri të Kosovës, duke përfshirë vendosjen e Njësive të Operacioneve Speciale dhe dorëheqjen e serbëve të Kosovës nga institucionet e Kosovës, dhe diskutimet në lidhje me një marrëveshje gjithëpërfshirëse ndërmjet Serbisë dhe Kosovës.
Mekanizmi i Reagimit të Shpejtë Kosovë-Serbi do të vazhdojë të takohet në baza tremujore për të formuluar qasje të përbashkëta ndaj problemeve që prekin komunitetet në Serbi dhe Kosovë. Për më tepër, ata do të takohen në baza ad hoc kur kërkohet që, për shembull, të shprehin shqetësimet e tyre në lidhje me një rast të veçantë të retorikës përçarëse ose një ngjarje që kërcënon të dëmtojë vetë mjedisin në të cilin po zhvillohet dialogu. /FolDrejt/
